Ástæða er til að hrósa Morgunblaðinu og þeim Andrési Magnússyni og Stefáni Einari Stefánssyni fyrir viðtal þeirra í Dagmálum við oddvita ríkisstjórnarinnar í hörkufróðlegum þætti í gær, sem tekinn var upp í Ráðherrabústaðnum við Tjarnargötu.
Viðtalið hefur vakið mikla athygli, en líka pirring, aðallega meðal vinstrafólks og fjölmiðlafólks á öðrum miðlum sem fékk annað hvort ekki sömu hugmynd eða hefur ekki sama aðgang að forystufólki í ríkisstjórninni og þeir Moggamenn.
En höfundar samsæriskenninga um að Katrín, Bjarni og Sigurður Ingi hafi mætt þarna í huggulegt kaffiboð án þess að krefjandi spurningar hafi verið settar fram, geta lagt þær til hliðar, því Andrés og Stefán Einar spurðu um margt sem brunnið hefur á þjóðinni og gerðu það vel.
Greinilegt er af viðtalinu að dæma, að ríkisstjórnarsamstarfið varð fyrir þungu höggi með afsögn Bjarna Benediktssonar sem fjármála- og efnahagsráðherra. Ekki var sjálfgefið að halda áfram, fundahöld þeirra þriggja sneru að „erindi ríkisstjórnarinnar“ og hvort halda ætti samstarfinu áfram.
Sigurður Ingi bendir á að þótt erfiðleikar hafi komið upp í samstarfinu, þurfi að hugleiða afleiðingar þess að hlaupa frá því. Hann spyr hvort það hefði reynst farsælla að efna til kosninga við þessar aðstæður eða hvort einhverjir aðrir flokkar á þingi gætu myndað betri ríkisstjórn til þess að fást við aðsteðjandi vanda. En hann er áfram á því að samstarfið hafi gengið vel. „Okkur hefur gengið býsna vel.“
Þótt sannarlega megi deila um þá fullyrðingu, er vel þess virði að horfa á viðtalið og kynna sér baksvið pólitískra atburða undanfarinnar daga. Dagmál eru streymi Morgunblaðsins á netinu og eru opin öllum áskrifendum blaðsins. Viðtalið allt má sjá með því að smella hér.
