SPYGATE: Samsæri Obama stjórnarinnar gegn framboði Donalds Trump

Hallur Hallsson skrifar:

„Spygate verður líklega minnst sem stærsta pólitíska hneykslis nútímasögu. Embættismenn stjórnar Obama áttu samráð við framboð Hillary Clinton og erlendar ríkisstjórnir um að hafa áhrif á forsetakosningarnar 2016. Upplýsingum var aflað á óhefðbundinn hátt, njósnagildrur settar upp og gögnum safnað saman á pólitískum forsendum til þess að hrinda af stað njósnum og eftirliti um framboð Donalds Trump.

Eftir kosningarnar var róðurinn hertur með samræmdum lekum á gögnum og röngum sögusögnum í fjölmiðlum.

Kortið tengir saman Spygate.  John Brennan, fyrrverandi forstjóri CIA var lykilmaður í að skapa sögsagnir um Rússa-samráð,“ segir Epoch Times.

Epoch Times og rússneska samráðið

Epoch Times í Ameríku hefur haft forystu um vandaðar hlutlægar fréttir af Spygate-hneykslinu í Ameríku. Epoch Times er í New York – fjölmiðill sem stofnaður var aldamótaárið – 2000. Hið unga blað hefur haft afgerandi forystu um fréttir af þessu líklega mesta hneyksli amerískrar sögu; njósnum um pólitískt framboð og síðan tilraunum til að koma réttkjörnum forseta frá völdum.

Nú liggur fyrir að „Russian Collusion“ – ásakanir þess efnis að Trump hafi haft samráð við Rússa og sé skósveinn Pútíns – er spuni frá upphafi til enda. Roberts Mueller, sérstakur saksóknari hefur skilað skýrslu sinni og hreinsað forsetann af ásökunum um samráð. Spygate hefur gert svokallað infographic eða upplýsingakort um Spygate-hneykslið. Ekki er ólíklegt að blaðamennirnir Jeff Carlsson og Jasper Fakkert aðalritstjóri hljóti Pulitzer-verðlaunin þegar spuninn um Spygate hefur verið afhjúpaður.

Pólitískar njósnir Obama-stjórnarinnar

Njósnir um framboð Donalds Trump hófust desember 2015. Barack Hussein Obama mun hafa fyrirskipað „eftirlit“ með Trump og verið upplýstur reglulega. Demókrataflokkurinn og framboð Hillary Clinton réðu lögfræðifirma í Washington, Perkins Cole sem réð rannsóknarfirma, Fusion GPS sem réð fyrrum breskan njósnara, Christopher Steele, sem hafði haft aðsetur í Moskvu.

Epoch Times segir John Brennan forstjóra CIA og álitsgjafa CNN höfund spunans. Þriðji æðsti embættismaður dómsmálaráðuneytisins [DOJ], Bruce Ohr, lék lykilhlutverk við að koma upplýsingum demókrata á framfæri til FBI þar sem James Comey var forstjóri.

FBI og FISA-dómstóllinn

FBI fékk heimild sérstaks njósnadómstóls, FISA, til þess að njósna um framboð Donalds Trump án þess að geta heimilda. Eftir að Trump hafði unnið sigur var róður hertur til þess að koma Trump úr embætti. Eftir uppsögn Comey setti arftaki hans, Andrew McCabe, af stað rannsókn um rússneskt samráð í maí 2017 og vangaveltur voru uppi um að setja forsetann af sem kjána og fáráð. Málið hins vegar var tekið úr höndum FBI og McCabe þegar Robert Mueller var skipaður sérstakur saksóknari.

Rannsókn Roberts Mueller hófst 17. maí 2017. Hún stóð í 675 daga; eða eitt ár, 10 mánuði og sex daga. Nítján lögmenn unnu á skrifstofu sérstaks saksóknara, dyggir demókratar og stuðningsmenn framboðs Hillary Clinton. Þeir vörðu 30 milljón dollurum í rannsóknina eða sem nemur yfir hálfum fjórða milljarði króna. 42 aðilar voru yfirheyrðir fyrir sérstökum rannsóknarrétti „grand jury“ og 34 voru ákærðir eða játuðu ýmsar sakargiftir í tengslum við rannsóknina en engar sem snéru að samráði við Rússa.

Af þessum 34 voru sex fyrrum ráðgjafar tengdir Trump en til viðbótar voru 26 Rússar ákærðir. 40 FBI agentar og sérfræðingar unnu að rannsókninni. Sérstakur saksóknari gaf út yfir 2.800 stefnur og bar fram fyrirspurnir til 13 erlendra ríkja og yfirheyrði yfir 500 vitni.

Sumsé ekkert samráð við Rússa.

Niðurstaðan var sem þruma úr heiðskíru lofti fyrir demókrata og fjölmiðla sem voru báru spunann inn á bandarísk heimili og veröldina með CNN, New York Times og Washington Post í broddi fylkingar. Hér á landi hefur RÚV ekki látið sitt eftir liggja við að teikna Trump upp sem fáráð.

Bill Barr dómsmálaráðherra Bandaríkjanna hélt blaðamannafund fyrr í dag — skírdag — um skýrslu Muellers sem í kjölfarið var gerð opinber — lesa má hana hér. Ráðherrann staðfesti efnislega „ekkert samráð; engar hindranir.“

Ráðherra vitnaði í skýrslu Muellers sem lýsir forsetanum „reiðum og svekktum“ vegna stöðugra leka og ásakana samráð við Rússa og nefnir 10 tilvik sem til skoðunar komu um að Trump hafi hindrað réttvísina en ekki liggja frammi sannanir til að ákæra forsetann.

Skömmu eftir blaðamannafund Barr tjáði forsetinn sig í Hvíta húsinu frammi fyrir særðum hermönnum. „Ekkert samráð, engar hindranir líkt og ég sagði strax í upphafi. Við verðum að komast til botns í þessu. Það má aldrei aftur gerast gagnvart öðrum forseta að svona blekkingaleikur [hoax] eigi sér stað.“

Nancy Pelosi leiðtogi demókrata í fulltrúadeildinni hefur sakað dómsmálaráðherrann um að þjóna ekki sem dómsmálaráðherra Bandaríkjanna heldur dómsmálaráðherra Donalds Trump. Trump hefur kallað eftir rannsókn á rannsakendunum.

Njósnir um pólitísk framboð stórmál

Nú virðast demókratar komnir í krappa vörn. “Njósnir áttu sér stað,” sagði Bill Barr dómsmálaráðherra fyrir bandaríkjaþingi fyrir páska. “Ég er þeirrar skoðunar að njósnir um pólitískt framboð séu stórmál [big deal],” sagði Barr enn fremur.

Bill Barr dómsmálaráðherra Bandaríkjanna.

James Comey fyrrum forstjóri FBI var inntur álits á þessum ummælum og svaraði: „Ég hélt að rafrænar hleranir væru ekki njósnir.“ [I never thought Electronic Surveillance was spying].

David Nunes, fyrrum formaður leyniþjónustunefndar fulltrúadeildarinnar, afhenti fyrir páska dómsmálaráðuneytinu nöfn átta einstaklinga sem hann telur að hafi framið lögbrot [criminal referrals]. Á næstu mánuðum má búast við að dómsmálaráðuneytið opinberi gögn um Spygate. Bretland, Ástralía og Nýja Sjáland eru hinar erlendu ríkisstjórnir sem Spygate vitnar til en eru líklega fleiri.

Watergate og Washington Post

Fréttir Epoch Times minna á fréttir Washington Post fyrir bráðum hálfri öld um Watergate sem blaðamennirnir Woodward og Bernstein hlutu heimsfrægð fyrir. Deep Throat hóf að leka úr kerfinu árið 1972 upplýsingum um innbrot í Watergate-bygginguna í Washington DC, skrifstofur Demókrataflokksins. Deep Throat var Mark Felt, varaforstjóri FBI. Woodward og Bernstein afhjúpuðu Richard Nixon sem leiddi til afsagnar forsetans 1974. Forsetinn hafði gengið framhjá Felt við skipan forstjóra eftir lát J. Edgars Hoover. Woodward og Bernstein unnu þrekvirk en svo hörmulega hefur tekist til að þeir félagar hafa nú tæpri hálfri öld síðar látið glepjast af spunanum í kringum „Russian Collusion“.

Kínverskrar rætur Epoch Times

Epoch Times grefur upp upplýsingar og stundar vandaða rannsóknarblaðamennsku. Fjölmiðillinn er staðsettur í New York.

Veröldin dáði hugrekki „Skriðdrekamaðsins – Tank man“ sem stóð óbugaður frammi fyrir kínverskum skriðdrekum á Torgi hins himneska friðar.

Epoch Times á kínverskan uppruna, stofnað árið 2000 í kjölfar ofsókna á hendur Falun Gong hreyfingunni og kínversku andófsfólki og atburða á Tiananmen torgi þegar þúsundir féllu er kínversk stjórnvöld brutu á bak aftur mótmæli ungs fólks árið 1989.

Hallur Hallsson var um árabil fréttamaður á Ríkissjónvarpinu og Stöð 2, en þar áður hafði hann verið blaðamaður á Dagblaðinu og Morgunblaðinu. / Viljinn: Rúnar Gunnarsson.

Veröldin dáði hugrekki „Skriðdrekamaðsins – Tank man“ sem stóð óbugaður frammi fyrir kínverskum skriðdrekum. Rætur Epoch Times eru sumsé í Kína sem útaf fyrir sig er stórmerkilegt. Nafngiftin forvitnileg. Epoch er tímaskeið í kjölfar atburðar sem markar nýja tíma.

„Við leitumst við að vera traustur heimsfjölmiðill; þjónum veröldinni af heiðarleika, ástríðu og von,“[We strive to be the most trusted global media as we uplift the world with integrity, compassion, and hope]“ segir á heimasíðu Epoch Times.

Enska útgáfan af Epoch Times kemur út frá mánudegi til föstudags í New York og Wasington og vikulega vítt og breitt um Bandaríkin og Kanada. Ásamt ensku kemur Epoch Times út á kínversku, spænsku, hebresku, víetnömsku, japönsku, kóresku, indónesísku og netútgáfur á frönsku, ítölsku, portúgölsku, sænsku, úkranísku, rússnesku, rúmensku, pólsku, tékknesku, slóvönsku, tyrknesku, búlgörsku og persnesku.

Epoch Times hefur sakir frétta sinna af Spygate verið í mikilli sókn á meðan CNN, Washington Post og New York Times og restin af prövdunum skreppa saman en Fox News, þar sem fréttamenn skiptast á að lasta og vegsama Donald Trump, sópar til sín áhorfi. Blaðamennska og trúverðugleiki fjölmiðla hefur orðið fyrir þungu áfalli sem vandséð er hvernig bætt verði úr.

Höfundur er blaðamaður.