Þegar öll orkan fer í að lifa af vonlaust stjórnarsamstarf

Eftir Þorbjörgu Sigríði Gunnlaugsdóttur:

Dagskrá Alþingis stendur auð. Ekkert heyrist frá ríkisstjórnarflokkunum um hvernig ríkisstjórnin ætl­ar að koma bönd­um á verðbólgu. Forystan ver öllum kröftum í vandræðaleg rifrildi. Öll starfsorka ríkisstjórnarinnar fer í að reyna að lifa þetta vonlausa samstarf af. Stærsta verkefni samfélagsins liggur óhreyft á meðan. Glím­an við verðbólgu og ógn­ar­háa vexti.

Í sterkri um­sögn BHM um fjár­laga­frum­varpið varp­ar banda­lagið ljósi á merkilegar staðreynd­ir um veru­leika al­menn­ings. Kaup­mátt­ur meðallauna hef­ur sveifl­ast fjór­um sinn­um meira sl. 20 ár á Íslandi en kaup­mátt­ur inn­an OECD-landa.

Verðbólga jókst um helm­ing milli 2022 og 2023 sem er eins­dæmi. Þessi óstöðug­leiki hag­kerf­is­ins er okkar helsta meinsemd. Og al­menn­ing­ur er langþreytt­ur á ástand­inu. Vext­ir eru rúm­lega tvö­fald­ir á við ná­granna­lönd. Fólk sem ný­lega keypti fast­eign og er með mik­il út­gjöld vegna barna og náms­lána finn­ur ræki­lega fyr­ir ástand­inu. Þetta er millistétt­in á Íslandi. Ríkisstjórnin hefur hins veg­ar eng­in svör fyr­ir þetta fólk. Þessi hóp­ur er skil­inn eft­ir.

Jöfnuður í tekjum er meiri á Íslandi en á öðrum Norðurlöndum. Og nú blasir við stöðnun um lífskjör ekki síst hjá millistéttinni. Fólkið sem greiðir háa skatta og finnur rækilega fyrir vaxtahækkunum. Af hálfu BHM hefur komið fram að 70% skatta og gjalda eru borin af þriðjungi þjóðarinnar. Í þessum hópi er meginþorri háskólamenntaðra.

Á fólk ekki að sjá ávinning í háskólamenntun? Eða í því að búa á Íslandi eftir háskólanám? Hagfræðistofnun Háskóla Íslands hefur bent á launaþróun á Íslandi frá aldamótum. Laun háskólamenntaðra hafa staðið í stað. Laun ófaglærðra hafa hækkað nokkurn veginn jafnt og þétt. Það er auðvitað ekki áhyggjuefni að laun ófaglærðra hafi hækkað heldur hitt hvernig við verðleggjum menntun. Að þau laun hækki ekkert.

Hvaða framtíðarmynd er þar verið að teikna upp þar fyrir Ísland?

Höfundur er þingmaður Viðreisnar.