Júlíus Vífill Ingvarsson, fyrrverandi borgarfulltrúi Sjálfstæðisflokksins, var í morgun dæmdur í tíu mánaða fangelsi í Héraðsdómi Reykjavíkur fyrir peningaþvætti. Dómurinn er skilorðsbundinn í tvö ár.
Fréttastofa Ríkisútvarpsins greindi fyrst frá dómnum. Júlíus Vífill var ekki viðstaddur dómsuppkvaðninguna.
Júlíus var með ákæru Héraðssaksóknara í ágúst sakaður um að þvætta tugmilljóna ávinning af fyrndum skattsvikum. Júlíus viðurkenndi að hafa ekki greitt skatta af fjármunum sem hann átti á erlendum bankareikningi.
Rannsókn skattayfirvalda á málinu fór af stað eftir að Kastljós fjallaði um Panamaskjölin í apríl 2016.
Hann er eini Íslendingurinn úr Panamaskjölunum sem hefur sætt ákæru vegna þess sem þar kom fram.
Fréttablaðið segir á vef sínum, að saksóknari hafi farið fram á átta til tólf mánaða óskilorðsbundið fangelsi yfir Júlíusi en hann var sakaður um að hafa þvættað 49 til 57 milljónir króna í gegnum sjóð sem hann var rétthafi að ásamt eiginkonu sinni og börnum. Fjármunirnir þar komu til vegna viðskipta bílaumboðsins Ingvars Helgasonar á árunum 1982 til 1993.
Hefur blaðið eftir saksóknara, að líklega muni embættið una þessum dómi.
