Þorsteinn Hjaltested, ábúandi á Vatnsenda við Elliðavatn og umsvifamikill fjárfestir, lést á heimili sínu aðfaranótt 12. desember síðastliðinn. Hann varð 58 gamall.
Þorsteinn fæddist í Reykjavík 22. júlí 1960, sonur Magnúsar Hjaltested, bónda á Vatnsenda og konu hans Kristrúnar Ólafar Jónsdóttur. Kristrún lifir son sinn.
Þorsteinn ólst upp á Vatnsenda og hefur jafnan kenndur við þessa miklu jörð. Um árabil hefur hann verið áberandi í fréttum vegna deilna um eignarhald jarðarinnar og ótalmargra dómsmála um hagsmuni sem henni tengjast, enda um milljarðatugi þar að tefla. Stór hluti efri byggða Kópavogs er í landi sem áður tilheyrði fjölskyldu Magnúsar.
Eignarnám Kópavogsbæjar í hluta jarðarinnar 2007 sat lengi í Þorsteini og síðast í sumar höfðaði hann mál gegn bænum og krafðist milljarða króna í skaðabætur. Hins vegar stóð hann einnig í málaferlum við ýmis ættmenni sín um erfðaréttindin að jörðinni.
Þorsteinn heitinn var matreiðslumeistari. Hann vann m.a. á Hótel Loftleiðum, var m.a. yfirmatreiðslumaður í verslunum Víðis og í Golfskálanum í Grafarholti. Einnig rak hann Sundakaffi um tíma, átti hlut í Veisluturninum í Kópavogi og sem bóndi á Vatnsenda hélt hann hross og kindur og stóð í margvíslegum fasteigna- og lóðaviðskiptum.
Kona Þorsteins var Kaire Hjaltested. Þau skildu. Synir þeirra eru Magnús Pétur og Björn Arnar.
