Hér kemur fróðleikur sem allir foreldrar ættu að kynna sér og ræða við börnin sín og unglinga:
Börn ættu að forðast skjátíma (að vera í snjallsíma eða skjábretti) að minnsta kosti klukkustund áður en þau fara í háttinn. Foreldrar verða líka að vera börnum sínum fyrirmynd í þessum efnum og hanga ekki endalaust í símanum þegar fjölskyldan er að reyna að njóta samvista.
Samtök barnalækna í Bretlandi hafa gefið út nýjar viðmiðunarreglur fyrir foreldra um notkun barna á snjalltækjum. Sífellt fleiri börn hafa hreinlega ánetjast þessum tækjum sem geta verið svo dásamlega spennandi, en vanabindandi í senn.
Samkvæmt viðmiðunarreglunum er skynsamlegt að foreldrar takmarki skjátíma barna og unglinga með einhverjum hætti, þar sem of mikil notkun þessara tækja getur haft í för með óæskilegar afleiðingar, svo sem erfiðleika með svefn og hegðunarvandamál.
Of mikill skjátími getur leitt af sér andleg veikindi, haft áhrif á matarlyst barna og latt þau til heilbrigðra lífshátta á borð við hreyfingu og hefðbundna leiki.
Þó er sem betur fer ekkert sem bendir til þess að það sé börnum beinlínis hættulegt að vera í snjalltækjunum sínum. Aðeins að allt er best í hófi í þessum efnum eins og öðrum.
Þess vegna var ákveðið að mælast ekki fyrir um aldurstakmörk þegar kemur að notkun snjalltækja á borð við síma og lófatölvur, aðeins að foreldrar fylgist vel með því sem börnin eru að gera, hvað þau eru að horfa á og taki sér hvíld frá notkuninni inn á milli.
Sérstaklega er tekið fram að ekki eigi að leyfa börnum að komast upp með að sleppa málsverði með fjölskyldunni af því þau vilja hanga inn í herbergi í snjalltækjunum sínum og ekki heldur þegar kemur að samverustundum með fjölskyldunni. Börn taki hins vegar lítið mark á slíkum reglum, ef foreldrarnir hanga sjálfir endalaust í símanum og séu vart viðræðuhæfir á meðan.
Takmörkun á notkun snjalltækja fyrir svefn þykir einkar mikilvæg, þar sem birtan frá skjánum er þess eðlis, að hún dregur úr náttúrulegri framleiðslu melatóníns í heilanum og börnin eiga því erfitt með að sofna.
Þótti þér þessi grein fróðleg? Deildu henni þá til þeirra sem þú telur að gætu haft gagn að henni.
