„Fyrir 10 árum komust falsanir fyrir almannasjónir (nóv. 2009, Climategate) með birtingu tölvubréfa frá „vísindamönnum“. Þrátt fyrir það hafa spárnar haldið áfram og eru nú orðnar að heimsendaspám sem meginfjölmiðlar, stjórnmálamenn, samtök og fyrirtæki taka þátt í.“
Þetta er á meðal þess sem Friðrik Daníelsson, efnaverkfræðingur, segir í grein sem Morgunblaðið birti á dögunum undir yfirskriftinni „Loftslagsvísindi hrjáð af fölsunum“.
„Skógareldar, óveður, bráðnun, súrnun og hverskyns breytingar eru tengdar við „loftslagsbreytingar“. Vísindatímarit og jafnvel vísindafélög hafa gert sig ber að hylmingum. En það sem er mest ógnvekjandi er að falsanirnar koma nú m.a. frá áður virtum stofnunum.“
Loftslagsnefnd Sameinuðu þjóðanna spáir á grundvelli falsana
Hann segir að milliríkjanefnd Sameinuðu þjóðanna um loftslagsbreytingar (IPCC) hafi sent frá sér vondar spár á grunni vísindafalsana í áratugi.
Vitnað er í enskan prófessor emerítus J. Brignell, sem sagði: „Stofnsetning IPCC var stórslys í sögu vísindanna. Hrein pólitísk stofnun látin koma fram sem vísindastofnun-“
Skýrsla IPCC nr. 25, sem rædd verður í Madríd nú í desember, er með svipaða spá og fyrri skýrslur sem allar reyndust falskar, segir í greininni.
Margir helstu vísindamennirnir sem áður störfuðu með nefndinni séu hættir, og hafi afhjúpað falsanirnar, og vitnað er í bandarískan prófessor emerítus R. Lindzen: „… móðursýkishlaðin skýrsla frá valdagráðugri stofnun – ólíkleg ágiskun studd af fölskum sönnunargögnum og endurtekin endalaust“ „… sumar fullyrðingar nefndarinnar falla undir skilgreininguna andvísindaleg heimska… “ er haft eftir prófessor emerítus A. Mörner frá Svíþjóð.
Vísindastofnanir leiðast í falsanir í von um fjárveitingar
Í greininni segir að Alþjóðaveðurfræðistofnunin (WMO) og Umhverfisstofnun Sameinuðu þjóðanna (UNEP) hafa tekið þátt í áróðri með Milliríkjanefndinni IPCC. Skriffinnar Sameinuðu þjóðanna og ESB hafi reynt að leiða áróðurinn fyrir „hamfarahlýnuninni“.
„Vandaðar rannsóknastofnanir í allnokkrum löndum hafa leiðst með í falsanirnar. Þær fá fjárveitingar frá stjórnmálamönnum (ríkinu) til „loftslagsrannsókna“ meðan þær geta haldið ógninni um hlýnun lifandi. Eftir að ljóst varð að loftslagshlýnunin 1980-2000 var hætt tóku vissar stofnanir að „aðlaga“ eldri hitamælingar að líkönum um hvernig loftslagið „ætti að breytast“ samkvæmt þeirra kenningum.“
Á meðal stofnana sem taldar eru upp í greininni sem hafa tekið þátt í að aðlaga gögn skv. greininni eru Hafs- og andrúmsloftsstofnunin (NOAA) og GISS, undirstofnun Bandarísku geimferðastofnunarinnar NASA. Grunur leiki á að byrjað sé að eiga við gervihnattamælingar að auki.
Öruggar hitamælingar sýni ekki marktæka hlýnun sl. 80 ár í Bandaríkjunum eða við strönd Íslands að N-Atlantshafinu né heldur í öðrum ríkjum Norðurlanda. Í Japan hafi loftslag kólnað síðustu áratugi.
Friðrik fer vandlega yfir það í greininni hvernig eðlisfræðileg lögmál sýni að þau litlu áhrif sem koltvísýringur hefur á hitastigið í lofthjúpnum séu nú þegar að mestu komin fram, og að svipað eigi við um metangas.
Grófasta fölsunin að aukning CO2 hækki hitastigið á jörðinni
„Grófasta vísindafölsunin er að aukinn koltvísýringur í lofthjúpnum hækki hitastigið á jörðinni. Koltvísýringsstyrkur loftsins hefur vaxið úr 0,03% í 0,04% á einni öld. Ef aukningin skyldi halda áfram í svipuðum takti verður styrkurinn orðinn 0,7% eins og á blómatíma gróðursins eftir um 3.000 ár og fastlandið orðið vel grænt.“
Haft er eftir prófessor emerítus D. Thoenes frá Hollandi í greininni: „ … það hefur ekki verið sýnt fram á með sannfærandi hætti að aukning CO2 í andrúmsloftinu hafi ákveðin áhrif á loftslag.“
Að lokum segir að af rannsóknum færustu óháðra vísindamanna sé orðið ljóst að aukinn koltvísýringur í lofthjúpnum hafi hverfandi áhrif á loftslagið á jörðinni.
