Endurskipuleggja þarf skuldir fyrirtækja í ferðaþjónustu ef ekki á illa að fara og það er líklega ekki úr vegi að tala um leiðréttingu. Annars gæti saga eftirhrunsáranna endurtekið sig þegar fyrirtæki voru yfirtekin og fjöldi fólks skilinn eftir í sárum.
Þessi skilaboð sem kalla mætti fyrsta útspil Sigmundar Davíðs Gunnlaugssonar, formanns Miðflokksins og fv. forsætisráðherra, setur hann fram í samtali við Morgunblaðið í dag. Undanfarið hefur verið beðið eftir því að Sigmundur Davíð kæmi fram á sviðið vegna kórónaveirukrísunnar, enda skammt til þingsetningar og alþingiskosningar áformaðar næsta haust.
Miðflokkurinn fór lengi vel ekki mikinn í gagnrýni sinni á stjórnvöld vegna viðbragða við veirufaraldrinum, en undanfarið hefur nokkur breyting orðið þar á. Skoðanakönnun MMR í gær sýnir umtalsverða fylgisaukningu flokksins, eða um tæplega þrjú prósentustig og mælist nú 10,8%.
Stuðningur við ríkisstjórnina mældist nú 51,0% og jókst um tæpt prósentustig frá síðustu könnun, þar sem stuðningur mældist 50,1%.
- Fylgi Sjálfstæðisflokksins mældist nú 25,6% og mældist 24,0% í síðustu könnun.
- Fylgi Pírata mældist nú 15,0% og mældist 14,3% í síðustu könnun.
- Fylgi Samfylkingarinnar mældist nú 12,8% og mældist 14,9% í síðustu könnun.
- Fylgi Miðflokksins mældist nú 10,8% og mældist 8,0% í síðustu könnun.
- Fylgi Viðreisnar mældist nú 9,4% og mældist 10,0% í síðustu könnun.
- Fylgi Vinstri grænna mældist nú 8,5% og mældist 9,6% í síðustu könnun.
- Fylgi Framsóknarflokksins mældist nú 8,3% og mældist 8,9% í síðustu könnun.
- Fylgi Sósíalistaflokks Íslands mældist nú 4,3% og mældist 3,4% í síðustu könnun.
- Fylgi Flokks fólksins mældist nú 3,6% og mældist 4,8% í síðustu könnun.
- Stuðningur við aðra mældist 1,7% samanlagt.
Flokksráðsfundur á laugardag
Miðflokkurinn heldur sinn fimmta flokksráðsfund laugardaginn 26. september á fjarfundaforritinu Zoom. Í upphafi fundar heldur formaður flokksins opnunarræðu sem setur tóninn fyrir komandi þingvetur.
Fundurinn hefst klukkan 13 og áætluð fundarlok eru kl 16:30.
Fundinn sitja helstu trúnaðarmenn flokksins og sá hópur telur um 110 manns. Öðrum flokksmönnum er frjálst að fylgjast með fundinum en þeir hafa ekki atkvæðisrétt. Fjöldi þeirra sem hafa skráð sig á fundinn er á þriðja hundrað og búist er við að þáttakendum fjölgi næstu daga. Til stendur meðal annars að taka ákvörðun um boðun Landsþings Miðflokksins og innri málefni flokksins eru rædd.
Óumflýjanlegt að styrkja ferðaþjónustuna
Sigmundur Davíð segir í viðtalinu við Morgunblaðið, að óumflýjanlegt sé að styrkja ferðaþjónustuna svo hún lifi af faraldurinn. Aðgerðir stjórnvalda til að halda aftur af veirunni skapi sterkan samfélagslegan og siðferðislegan rétt ferðaþjónustu og annarra atvinnugreina til að njóta aðstoðar.
Framundan sé erfiður vetur þar sem samdrátturinn muni færast meira yfir í önnur svið hagkerfisins en ferðaþjónustuna.
Leiðrétting verðtryggðra íbúðalána var helsta kosningamálið í alþingiskosningunum 2013 og stóra útspil Framsóknarflokksins þá, undir forystu Sigmundar Davíðs, og kom svo til framkvæmda árið 2015 þegar hann var orðinn forsætisráðherra.
Sigmundur Davíð telur aðferðafræði leiðréttingarinnar geta nýst aftur nú:
„Ég tel að slík leiðrétting gæti vel verið viðeigandi leið og að reynslan af leiðréttingu íbúðalána geti komið að gagni. Það var alltaf lykilatriðið í leiðréttingunni að ekki væri verið að gefa einhverjum eitthvað sem hann ætti ekki tilkall til, heldur aðeins að bæta eins og kostur væri tjónið sem varð af þessum ástæðum,“ segir hann.
Hann kveðst hafa miklar áhyggjur af einhæfara fyrirtækjalandslagi og samþjöppun framundan. „Þar sem menn nota tækifærið, ef svo má segja, og kaupa fyrirtæki af þeim sem hafa lent í miklum hremmingum, og þá á lágu verði, og njóti svo einir ágóðans þegar hlutirnir lagast. Að þeir njóti þess að hafa haft tækifæri til að kaupa eignir á brunaútsölu án þess að verða fyrir tjóninu, og að þetta leiði til samþjöppunar, ekki aðeins í þessari grein heldur jafnvel í öðrum greinum líka.“
