Íslendingar virðast vera að búa sig undir vaxandi verðbólgu. Viljinn þekkir mörg dæmi þess að fólk sé að endurfjármagna húsnæðislán sín og skipta yfir í óverðtryggð lán, enda þótt það þýði hærri greiðslubyrði á mánuði. Ávinningurinn af því að höfuðstóll lánanna rjúki ekki upp í verðbólguskoti er talinn vega slíkt upp og miklu meira en það.
Morgunblaðið greinir frá því í dag, að gríðarleg aukning sé á nýjum óverðtryggðum útlánum heimilanna með veði í íbúðarhúsnæði samkvæmt tölum Seðlabankans. Hafa þau aldrei verið hærri, um 10,3 milljarðar, og jukust um tæplega fjörtíu prósent milli mánaða, sem er mjög mikil breyting.
Svo hröð er þessi þróun, að ný húsnæðislán í október skiptust þannig að óverðtryggð voru 79% og verðtryggð 21%. Þetta er skýrt merki um yfirfærslu í lánum fólks af ótta við aukna verðbólgu.
Morgunblaðið hefur eftir sérfræðingi, að fólk óttist verðbólgu, lækkandi gengi og mikla óvissu í kjarasamningum sem verða lausir um áramót.
