Segir Flokk fólksins stærri eftir brotthvarf Ólafs og Karls Gauta

Inga Sæland, formaður Flokks fólksins, kveðst ekki sjá eftir því að stjórn flokks­ins hafi ákveðið að reka Karl Gauta Hjalta­son og Ólaf Ísleifs­son úr flokkn­um þótt fylgið hafi dvínað mjög í kjölfarið. Hún segir flokkinn í vissum skilningi hafa stækkað við brottreksturinn og varar við eftirlíkingum á borð við Sósíalistaflokk Íslands.

Þetta kom fram í viðtali Bjartar Ólafs­dótt­ur, fv. ráðherra, við Ingu á Þing­völl­um á K100 í gærmorg­un.

Um það sagði Inga að í viss­um skiln­ingi hefði flokk­ur­inn orðið stærri eft­ir að Karl Gauti og Ólaf­ur voru rekn­ir úr flokkn­um. Hún og fleiri væru fórnarlömb í Klaustursmálinu og hún væri orðin þreytt á að ræða það.

Auk þess væri ljóst að kjósendur Flokks fólksins hefðu ekki verið að greiða atkvæði til auðkýfingsins Sigmundar Davíðs, sagði hún, aðspurð um hvort þeir Ólafur og Karl Gauti væru á leið í Miðflokkinn.

Þegar Björt spurði Ingu út í þá staðreynd að Flokk­ur fólks­ins hefði upp á síðkastið tapað fylgi meðan Sósí­al­ista­flokk­ur­inn bætti við sig svaraði Inga: „Var­ist eft­ir­lík­ing­ar.“