Karl Gauti Hjaltason, þingmaður utan flokka í kjölfar þess að honum og Ólafi Ísleifssyni var vísað úr Flokki fólksins fyrir jól, kveðst margoft hafa gert athugasemdir við það hvernig haldið er á fjármálum Flokks fólksins.
Hann skrifar grein í Morgunblaðið í dag, þar sem hann lítur yfir liðið ár í pólitíkinni og segir:
„Síðla í nóvember, eftir að ég hafði lokið þátttöku minni við aðra umræðu fjárlaga, sat ég undir orðræðu sem spannst í hópi samstarfsmanna og ratað hefur í fjölmiðla. Ég hef beðist afsökunar á þeim mistökum að sitja of lengi undir þessum umræðum,“ segir Karl Gauti í greininni um Klaustursmálið.
„Einhverjir hafa staldrað við ummæli mín við þetta tækifæri um hæfileika formanns Flokks fólksins til að leiða stjórnmálaflokk. Örskömmu síðar rak stjórn flokksins mig við annan mann úr flokknum.
Þessa gagnrýni hafði ég, á því ári sem ég hef verið í flokknum, margítrekað látið í ljósi beint við formanninn, meðal annars á vettvangi þingflokksins og í stjórn flokksins, þar sem ég var kjörinn með flestum atkvæðum allra stjórnarmanna á landsfundi flokksins í september sl.
Ég tel ekki forsvaranlegt að formaður stjórnmálaflokks sitji yfir fjárreiðum hans með því að vera jafnframt prókúruhafi og gjaldkeri flokksins. Þá get ég heldur ekki sætt mig við að opinberu fé sé varið til launagreiðslna í þágu nánustu fjölskyldumeðlima stjórnmálaleiðtoga. Landslög kveða skýrt á um vandaða meðferð þeirra fjármuna sem stjórnmálaflokkar þiggja úr almannasjóðum og er mikilvægt að eftir þeim sé farið,“ segir Karl Gauti.
Spurningar frá Viljanum
Í tilefni greinar Karls Gauta, hefur Viljinn sent Ingu Sæland nokkrar spurningar og er beðið svara við þeim.
Þær eru:
1.Er það rétt að Karl Gauti hafi ítrekað gagnrýnt fjárreiður flokksins og að þú hefðir prókúru sem gjaldkeri og formaður?
2. Ertu enn með prókúru?
3. Hefur flokkurinn verið með aðila þér nákomna í launaðri vinnu? Hvað hafa þeir fengið greitt?
4. Finnst þér eðililegt að ráða fjölskyldumeðlimi í slík störf sem njóta opinberra styrkja, án auglýsingar?
5. Er eitthvað í bókhaldi Flokks fólksins sem ekki þolir skoðun?
6. Er eitthvað til í því, sem haldið hefur verið fram, að þú sért ásamt nýjum þingflokksformanni á leið í Samfylkinguna?
