Davíð Oddsson, ritstjóri Morgunblaðsins, vandar Ríkisútvarpinu (RÚV) ekki kveðjurnar í Staksteinum í Morgunblaðsins í dag.
Hann sakar ríkisfjölmiðilinn um leynd og ógagnsæi, skattasniðgöngu og möguleg lögbrot, m.a. vegna þess hvernig stofnunin skirrist við að birta nöfn umsækjenda um stöðu útvarpsstjóra.
Einnig talar nefnir hann skattasniðgöngu stofnunarinnar, sem hefur enn ekki stofnað dótturfélag utan um aðra starfsemi en fjölmiðlun í almannaþágu, eins og fram kom í úttekt Ríkisendurskoðunar.
Staksteinar í dag:
„Ríkisútvarpið fór í samkvæmisleik á vef sínum á föstudag undir fyrirsögninni Hverjir sækja um stöðu útvarpsstjóra? Þar kom fram að umsóknarfrestur um stöðuna rynni út í dag, mánudag, ýmis nöfn hefði borið á góma og að ríkisfréttastofan hefði náð tali af sumum mögulegum lysthafendum.
Þá kom fram að stjórn stofnunarinnar hefði ákveðið að birta ekki lista yfir umsækjendur. Ríkisfréttastofan virtist telja þetta alveg sjálfsagt og sá ekki ástæðu til að spyrja út í lögmæti þeirrar ákvörðunar að halda umsækjendum leyndum. Morgunblaðið gerði það hins vegar og birti svör sitjandi útvarpsstjóra um helgina.“
Skattasniðganga, leynimakk og lögbrot
“Þau voru ekki sannfærandi. Þetta leynimakk og mögulegt lögbrot kemur þó ekkert á óvart og er aðeins framhald af hegðun stofnunarinnar, sem felur sig á bak við „ohf.“ þegar hentar og brýtur þau lög sem henni eru ekki þóknanleg. Stofnunin hefur til dæmis fjármagnað sig með útgáfu skráðra skuldabréfa og hefur notað það sem rök fyrir því að halda fjárhagsupplýsingum frá landsmönnum, eigendum sínum.
Stofnunin hefur sýnt yfirgang á auglýsingamarkaði og stundað skattasniðgöngu með því að neita að stofna dótturfélag, eins og alræmt er orðið. Og nú neitar stofnunin að gefa upp nöfn umsækjenda með þeim rökum að fari hún að upplýsingalögum fái hún ekki hæfa umsækjendur. Hversu langt þarf Rúv. að ganga til að ganga fram af stjórnvöldum, þingi og þjóð?“
