Stjórn Sambands ungra sjálfstæðismanna (SUS) hefur kallað eftir því að óháð rannsókn fari fram á stjórnsýslu Seðlabanka Íslands (SÍ) í tengslum við málsmeðferðir, kærur og sáttir sem bankinn hefur átt þátt í vegna meintra brota á gjaldeyrislögum
Ungir sjálfstæðismenn segja komnar fram sterkar vísbendingar um að bankinn hafi misbeitt sér við rannsókn mála er vörðuðu meint brot á gjaldeyrislögum.
Í yfirlýsingu sem SUS sendi frá sér í dag er sagt mikilvægt að rannsóknin verði framkvæmd af óháðum aðila sem er ekki tengist Seðlabankanum.
„Ekki síst vegna þess að nauðsynlegt er að endurreisa traust SÍ, einnar æðstu stofnunar ríkisins, enda jafnframt um að ræða eina voldugustu stofnun þess. Í því skyni þarf að upplýsa um og rannsaka þær fjölmörgu ásakanir sem hafa verið settar fram síðastliðin ár, ýmist í viðtölum, blaðagreinum og jafnvel heilum bókum sem hafa verið skrifaðar um misferli í stjórnsýslu gjaldeyriseftirlits SÍ.
SÍ hefur rekið rannsóknir jafnt innanhúss sem og í fjölmiðlum, einstaklingum og fyrirtækjum til mikils skaða. Þá eru dæmi um að sektir hafi verið lagðar á lögaðila án fullnægjandi lagaheimildar og að haldlagning gagna hafi verið grundvölluð á röngum útreikningum. Mál hafi svo verið rekin svo árum skiptir án þess að rannsókn hafi þokast áfram með tilheyrandi óvissu fyrir viðkomandi aðila. Fjölmörg önnur dæmi má nefna en nauðsynlegt er að aðhafast þegar ein æðsta stofnun ríkisins er borin sökum sem þessum,“ segir í yfirlýsingunni.
Athygli vekur að Ungir sjálfstæðismenn vilja jafnframt að rannsókn fari fram á „augljósu samstarfi“ Seðlabankans og Ríkisútvarpsins. Upplýsingum hafi beinlínis verið lekið til fjölmiðla til að auka hróður Seðlabankans á kostnað þeirra sem voru undir rannsókn.
Sjá einnig frétt Viljans: Varð Samherjamálið til í þorrablóti austur á fjörðum?
