Sagt er að flugbransinn sé þannig að hægt sé að tapa miklu ótrúlega hratt þegar illa árar og víst er að níu mánaða uppgjör flugfélagsins Wow air, sem birt var í gærkvöldi, endurspeglar það. Félagið var rekið með 33,6 milljón dollara tapi, um 4,2 milljörðum króna, á fyrstu níu mánuðum ársins.
Þetta er nánast tvöfalt meira tap en á sama tíma árið áður og þýðir að félagið tapaði fimmtán milljónum króna að jafnaði á dag hvern einasta dag á fyrstu níu mánuðum ársins.
Tölurnar sem birtar voru í gærkvöldi eru þó ekki alslæmar. Hagnaður var á þriðja ársfjórðungi upp á 14 milljónir dollara sem er bæting frá fyrra ári, auk þess sem tekjur flugfélagsins á þessu tímabili jukust um nálega 30% milli ára og voru alls 457 milljónir dollara.
Í tilkynningu með uppgjörinu, sem birt er á ensku á vef Wow air, er minnt á að neikvæð umfjöllun fjölmiðla og óvissa um framtíð flugfélagsins hafi spillt fyrir miðasölu, hert á lánaskilmálum og ollið þannig verri lausafjárstöðu. Olíuverð hafi hækkað verulega, þótt sú hækkun sé nú að mestu gengin til baka.
Sjá tilkynninguna á vef Wow air.
Eins og fram kom á fimmtudagskvöld, hefur Wow air gert bráðabirgðasamkomulag við bandaríska eignastýringasjóðinn Indigo Partners um að hann fjárfesti í félaginu og tryggi þannig rekstrarhæfi þess og grundvöll til framtíðar.
Fjárfestingin er þó gerð með fyrirvara um áreiðanleikakönnun sem stendur nú yfir,
