Katrín Jakobsdóttir, forsætisráðherra, átti fund með leiðtogaráði Evrópusambandsins ásamt forsætisráðherrum Noregs og Liechtensteins í Brussel í morgun í tilefni 25 ára afmælis EES-samningsins.
Fyrir fundinn átti forsætisráðherra morgunverðarfund með forsætisráðherrum Liechtensteins og Noregs áður en haldið var á leiðtogafundinn. Að loknum leiðtogafundinum fluttu forsætisráðherrarnir stutt ávörp og veittu fjölmiðlum viðtöl.
„Heil kynslóð Íslendinga gengur út frá því að hægt sé að vinna, ferðast, búa og læra hvar sem er á evrópska efnahagssvæðinu ólíkt því sem áður var – það þarf ekki að nefna hversu miklu þetta skiptir litla eyþjóð eins og okkur og hversu mikilvægur samningurinn hefur reynst íslensku atvinnulífi,“ segir Katrín Jakobsdóttir forsætisráðherra á vef stjórnarráðsins.
„Það er mjög ánægjulegt að fá að fagna afmæli samningsins með leiðtogum ríkja ESB. EES-samningurinn veitir okkur enn fremur tækifæri að eiga samtal um mikilvæg alþjóðamál svo sem loftslags- og mannréttindamál, sem er ekki vanþörf á í ljósi þróunar heimsmála,“ bætir hún við.
Forsætisráðherrar EES-EFTA ríkjanna samþykktu sameiginlega yfirlýsingu þar sem áframhaldandi mikilvægi samningsins var undirstrikað.
Yfirlýsing forsætisráðherra EES-EFTA ríkjanna í tilefni 25 ára afmæli EES-samningsins
