Icelandair Group hefur tilkynnt Kauphöll Íslands nú í kvöld, að það stefni að því að safna allt að 200 milljónum Bandaríkjadala, eða milli 29 og 30 milljörðum króna í almennu hlutafjárútboði sem haldið verður í júní næstkomandi.
Eins og Viljinn skýrði frá síðdegis, hefur ríkisstjórnin samþykkt að opna á samtal við Icelandair um lánalínu eða ríkisábyrgð að tilteknum skilyrðum uppfylltum. Eitt þeirra er að félagið afli sér nýs hlutafjár.
Almenningi og öðrum fjárfestum verður gefinn kostur á að kaupa hluti í félaginu í útboðinu, auk þess sem kröfuhöfum verður boðið að breyta kröfum í eigið fé.
Tæplega 2.200 manns var sagt upp hjá félaginu nú fyrir mánaðarmótin eftir að stjórnvöld kynntu björgunarpakka þrjú, þar sem stór hluti fyrirtækja sem orðið hafa fyrir mjög miklu tekjufalli vegna kórónuveirufaraldursins fá ríkisaðstoð til að greiða uppsagnarfrest. Í tilfelli Icelandair er ljóst að umrædd ríkisaðstoð hleypur á milljörðum króna.
Í tilkynningu Icelandair segir að að útboðið sé mikilvægur liður í fjárhagslegri endurskipulagningu félagsins og þar er þess jafnframt getið, að viðbúið sé að frekari skilyrði verði sett fyrir ríkisaðstoð við fjármögnun félagsins í kjölfar hlutafjárútboðsins.
