Ný könnun Prósents, sem birt er í Morgunblaðinu í dag, sýnir að Halla Hrund Logadóttir orkumálastjóri heldur enn forystu með 29,7%. Næst kemur Katrín Jakobsdóttir, fv. forsætisráðherra, með 21,3% og segir blaðið hana aftur vera að sækja í sig veðrið eftir að hafa lækkað nokkuð bratt í liðinni viku.
Stutt og innan tölfræðilegra vikmarka er svo Baldur Þórhallsson prófessor. Þau Halla Tómasdóttir og Arnar Þór Jónsson bæta nokkuð við sig frá fyrri könnunum.
Föstudagurinn sl. var stór dagur þegar kom að sjónvarpskappræðum. Stefán Einar Stefánsson tók umtalað viðtal við Höllu Hrund í Spursmálum, þrír efstu skv. könnunum mættust í Pallborði Vísis og um kvöldið voru allir frambjóðendur í kappræðum Ríkisútvarpsins.
Athygli vekur, að nýja könnunin er ekki mælikvarði á það, hvernig landsmenn mátu frammistöðu frambjóðenda í þessum þáttum.
„Rétt er að taka fram að könnunin var gerð í liðinni viku og fram á gærdag, en þorri svaranna barst áður en sjónvarpskappræður forsetaframbjóðenda fóru fram. Viðbúið er að þær hafi haft nokkur áhrif á fylgi frambjóðenda, sem þessi könnun endurspeglar ekki,“ segir Morgunblaðið og enn verður því að bíða eftir könnunum sem gefa til kynna áhrif sjónvarpsumræðnanna.
