Erna Bjarnadóttir hagfræðingur og varaþingmaður hyggst ekki fylgja Birgi Þórarinssyni úr Miðflokknum og verða varaþingmaður Sjálfstæðisflokksins á kjörtímabilinu. Þetta er þvert á þær yfirlýsingar sem Birgir Þórarinsson gaf um leið og hann tilkynnti brotthvarf sitt á dögunum.
Viljinn sagði frá því í gærkvöldi, að þótt Erna hefði engu svarað fyrirspurnum fjölmiðla um málið, hefði hún í einkasamtölum við stuðningsmenn sína staðfest að hún væri enn í Miðflokknum. Í þættinum Bítinu á Bylgjunni í morgun rauf hún loks þögnina og staðfesti að hún yrði áfram varaþingmaður Miðflokksins.
Það þýðir að Miðflokkurinn fær þriðja þingsætið þegar og ef Birgir Þórarinsson forfallast á kjörtímabilinu í lengri eða skemmri tíma.
„Ég hef ekki skráð mig í Sjálfstæðisflokkinn og er ekki á leiðinni þangað,“ sagði Erna í Bítinu í morgun. Hafnaði hún því að hún yrði varaþingmaður flokksins.
Birgir Þórarinsson sagði við fréttastofu RÚV á laugardag að Erna færi með honum yfir í Sjálfstæðisflokkinn: „Hún er öflugur varaþingmaður og hefur staðið fyrir mörg góð málefni og telur að hún nái best framgangi með þau mál með því að vera í þá náttúrlega í öflugum og stórum þingflokki þar sem er góður málefnalegur samhljómur.“
