Breska ríkisútvarpinu (BBC) hefur verið gert að draga umtalsvert saman í starfsemi sinni og selja útvarpsstöðvar, samkvæmt tillögum sem ættaðar eru úr forsætisráðuneytinu þar í landi.
Ætlunin er að taka útvarpsgjald, sem Bretar greiða, til endurskoðunar og taka upp áskriftarfyrirkomulag þess í stað. Ljóst er að stofnunin verður þar með af umtalsverðum tekjum og mun þurfa að draga verulega úr starfsemi sinni.
Helstu atriði í tillögum breska forsætisráðherrans eru þessi:
● Afnema útvarpsgjaldið og taka upp áskriftarfyrirkomulag
● BBC selji stærstan hluta úrvarpsstöðva sinna (sem eru 61 talsins)
● Fækka sjónvarpsstöðvum, en þær eru tíu talsins
● Draga úr umsvifum BBC á Netinu
● Banna starfsfólki BBC að hafa hliðartekjur af öðrum störfum
Tillögurnar koma að sögn Lundúnablaðsins Times í kjölfarið á harðri gagnrýni Boris Johnson forsætisráðherra á breska ríkisútvarpið undanfarin misseri, ekki síst í nýliðinni kosningabaráttu.
Útvarpsstjóri BBC hefur sagt að áskriftarfyrirkomulagið fæli í sér umtalsvert tekjutap fyrir stofnunina og gæti þýtt að vinsælir dagskrárliðir verði lagðir niður. Áskrift á borð við það sem Netflix innheimtir mánaðarlega myndi bitna mjög á almannaþjónustuhlutverkinu.
Breska ríkisstjórnin hefur látið uppi að til skoðunar sé að fella niður refsiheimildir gegn þeim sem neita að borga nefskattinn til stofnunarinnar frá árinu 2022 og gefið í skyn að hann verði alveg lagður niður frá árinu 2027, þegar núverandi þjónustusamningur rennur út.
Haft er eftir háttsettum aðila í forsætisráðuneytinu að ekki sé um innantómar hótanir að ræða, BBC verði að draga saman seglin. Stofnunin starfræki fjölda útvarpsstöðva og hafi sótt mjög fram á Netinu og margt í starfseminni sé utan lögbundinnar skyldu og þar hljóti að mega hagræða eins og annars staðar.
