Eigum að umbreyta eigninni í Íslandsbanka í arðbærar fjárfestingar í innviðum

Góðu fréttirnar eru þær að við erum í einstakri stöðu til að hefja uppbyggingarskeið, segir Jón Gunnarsson þingmaður og ritari Sjálfstæðisflokksins í fylgiriti frá Sjálfstæðisflokknum sem fylgir Morgunblaðinu í dag og ber heitið: Á réttri leið. Markar það upphaf fundaherferðar þingflokks sjálfstæðismanna um landið.

„Við eigum einfaldlega að umbreyta eign ríkisins í Íslandsbanka í arð­bærar fjárfestingar í innviðum. Það er af nógu að taka, allt frá hefð­bundnum samgöngufjárfestingum í vegum, brúm og höfnum yfir í fjarskipti, s.s. nýjan gagnastreng og aðra grunninnviði m.a. í heil­brigðisþjónustu.

Það getur tekið tíma að losa um eignarhaldið, en mikilvægast er að setja stefnuna á að selja. Hér er mikilvægt að hafa í huga að ekki er nauðsynlegt að selja allt í einu svo það skipti verulegu máli.

Eigið fé Íslandsbanka er rúm­lega 170 milljarðar króna. Jafnvel þótt bankinn myndi seljast á lægra verði en eigið fé hans segir til um, myndi sala á 25–50% eignar­hlut á næstu árum opna stór tæki­færi til fjárfestinga. Ég efast um að nokkur önnur þjóð í Evrópu sé í annarri eins stöðu til að taka til í efnahagsreikningi sínum og leggja grunn að aukinni verðmæta­sköpun til framtíðar,“ segir hann ennfremur.

Á undanförnum árum hefur mikið verið rætt um gjaldtöku til að fjármagna samgöngubætur og Jón segir það skiljanlegt, vegna þess að við þurfum að hraða fram­kvæmdum, en nærtækari leið sé að losa um þessa verðmætu eign og afmarka gjaldtöku í framtíðinni við stærri framkvæmdir á borð við Sundabraut, Hvalfjarðargöng og aðra gangagerð.

„Í ljósi til­lagna fjármálaráðherra um að hluti söluverðmætis Íslandsbanka fari til fjárfestinga í samgöngumálum, gjörbreytast forsendur samgöngu­ætlunar sem þingið hefur til með­ferðar þessa dagana. Það er mjög jákvætt að staða ríkissjóðs skuli vera orðin svo öflug að hægt sé að falla frá hugmyndum um að sölu­verðmæti bankanna fari til þess að greiða niður skuldir eins og upp­hafleg áform voru um.

Nýjar forsendur fjármálaráð­herra draga verulega úr þörfinni á að efna til sérstakrar gjaldtöku til uppbyggingar samgöngumann­virkja. Mikilvægt er að samgöngu­ nefnd Alþingis taki tillit til þessa í vinnu við samgönguáætlun og að fundin verði leið til að fram­kvæmdir á grundvelli þessa hefj­ist á þessu ári. Með þeirri leið sem ráðherra boðar getum við von­andi bætt við verkefnum fyrir tugi milljarða á fyrsta tímabili áætlunarinnar. Áhrifin yrðu mjög mikil og í hönd færu mestu fjár­festingar sögunnar í samgöngumannvirkjum á Íslandi,“ segir Jón Gunnarsson.