„Þetta er allt í rétta átt,“ sagði Skúli Mogensen, forstjóri og aðaleigandi WOW air, í stuttu samtali við Viljann í kvöld, en forsvarsmenn félagsins vinna nú að lokafrágangi samkomulags við helstu kröfuhafa og skuldabréfaeigendur um að breyta skuldum félagsins í hlutafé.
Þar með var hann rokinn og ekki frekari upplýsingar að fá á þessu stigi málsins.
Á kynningarfundi í kvöld var einhugur um þessa áætlun, að því er fram kemur á fréttavef Morgunblaðsins.
Kröfuhafar eignast þá 49% í miklu skuldléttara félagi og næsta skref er þá að finna fjárfesti til að skrá sig fyrir nýju fjármagni sem gæfi um leið 51% hlut í fyrirtækinu.
Fram hefur komið í Fréttablaðinu að bráðafjármagn þurfi strax upp á 40 milljónir dollara, eða um 5 milljarða íslenskra króna.
Þess er nú beðið að formleg staðfesting á samkomulagi kröfuhafanna birtist á fjárfestavef félagsins, en í stuttri tilkynningu í gær, var því heitið að frekari tíðinda yrði að vænta í dag eða kvöld.
Fyrr í dag hafði Jón Karl Ólafsson, fv. forstjóri Icelandair, sagt í samtali við útvarpsstöðina K100, að hann teldi ólíklegt að kröfuhafar WOW air, eins og flugvélaleigusalar, væru tilbúnir að breyta kröfum sínum yfir í hlutafé.
Jón Karl sagðist hins vegar taka ofan fyrir Skúla. „Hann heldur alltaf áfram og það virðist alltaf vera ljós við endann á göngunum og það er virðingarvert.“
