Vinstri græn, flokkur forsætisráðherrans, myndu falla af þingi og hvorki ná lágmarki fyrir jöfnunarþingmann eða nokkrum kjördæmakjörnum manni á þing, samkvæmt nýjum Þjóðarpúlsi Gallup, sem Ríkisútvarpið skýrði frá í kvöld. Aldrei í Íslandssögunni hefur það gerst að flokkur forsætisráðherrans í ríkisstjórn tapi öllum þingsætum sínum og sætir könnunin því miklum tíðindum, ekki síst fyrir þær sakir að flokksráðsfundur VG hófst í dag.
Þjóðarpúlsinn er mæling á fylgi stjórnmálaflokkanna allan febrúarmánuð og er vísbending um niðurstöðurnar, ef gengið yrði til kosninga í dag. Samfylkingin dalar lítillega en mælist áfram stærst, Sjálfstæðisflokkur og Miðflokkur sækja í sig veðrið en litlar breytingar eru á fylgi annarra flokka.
VG mælist með 4,7% fylgi, voru í 5,5% fylgi fyrir mánuði og hefur aldrei verið lægra.
Langstærsti flokkurinn, samkvæmt könnuninni, er Samfylkingin, þótt hún dali lítillega milli mánaða. Fylgið er nú 28,2%.
Sjálfstæðisflokkurinn bætir aðeins við sig, er nú með 19,9& og Miðflokkurinn er áfram í stórsókn, hefur ekki mælst stærri í rúm fjögur ár og fær 12,8% fylgi.
Framsóknarflokkurinn fengi 8,8% fylgi, Píratar 8,0%, Viðreisn 7,5%, Flokkur fólksins 6,8% og Sósíalistar fengju 3,5%.
