Fréttastofa Stöðvar 2, Vísis og Bylgjunnar hefur dregið til baka frétt sem birt var í hádeginu í dag og fjallaði um Gunnar Braga Sveinsson, þingmann Miðflokksins og fv. utanríkisráðherra.
Eins og Viljinn skýrði frá í dag, brást sonur Gunnars Braga, við fréttaflutningi Bylgjunnar og sagði hann alrangan. Hið sama hafa fleiri aðilar, sem voru viðstaddir leiksýningu í Borgarleikhúsinu umrætt kvöld, gert.
Í frétt sem birtist á Vísi í kvöld segir:
Í hádegisfréttum Bylgjunnar og á Vísi í dag var sögð sú frétt að Gunnar Bragi Sveinsson hafi orðið missaga um áfengisneyslu sína en hann hefur sagt opinberlega að hann hafi ekki drukkið áfengi frá því í nóvember.
Í fréttinni var vísað til heimildarmanna um að Gunnar Bragi hafi verið drukkinn á sýningu Borgarleikhússins um miðjan janúar.
Fréttastofan gerði mistök með því að birta fréttina áður en náðist í Gunnar Braga sjálfan eða heimildar fengust staðfestar og biðst afsökunar á því.
Fréttaflutningurinn var ekki samkvæmt ritstjórnarstefnu fréttastofu Stöðvar 2, Bylgjunnar og Vísis og hefur fréttin því verið fjarlægð af vefnum.
