Á Degi náttúrunnar í dag, mánudaginn 16. september kl. 17:00, hefst í Skálholti athöfn þar sem helgaður verður skógræktarreitur til kolefnisjöfnunar fyrir söfnuði í þjóðkirkjunni.
Þegar hafa átta söfnuðir byrjað að taka grænu skrefin svokölluðu í samstarfi við umhverfisnefnd kirkjunnar – Græna kirkjan, samkvæmt upplýsingum frá Þjóðkirkjunni.
Hallgrímssöfnuður í Reykjavík hefur ákveðið að kolefnisjafna sína starfsemi árlega með skógrækt. Í Skálholti verða á Á Degi náttúrunnar hópar frá Hallgrímskirkju, Kópavogskirkju og Skálholtskirkju sem taka munu þátt í helgun reitsins með viðeigandi athöfn og planta „sóknartrjám“.
Kristján Björnsson vígslubiskup og séra Halldór Reynisson stýra athöfnininni.
Að lokinni trjáplöntun verður málsverður í Sumarbúðum kirkjunnar sem kostar kr. 1500.
Rúta fer frá Hallgrímskirkju kl. 16:30 í dag og er áætlað að koma til baka um kl. 21:00.
Helgun skóræktarreitsins er hluti af Grænu kirkjunni. Græna kirkjan er skilgreining og stefna íslensku þjóðkirkjunnar um að vera leiðandi í umhverfisátaki heimsins. Átak sem miðar m.a. að því að ná tökum á loftslagsvanda samtímans.
Eins og fyrr greinir hafa átta söfnuðir þjóðkirkjunnar byrjað á að taka grænu skrefin. Um þau má nánar lesa hér.
Á vef Þjóðkirkjunnar er bent á að Íslenska þjóðkirkjan telji 237 þúsund safnaðarmeðlimi. „Græn kirkja er því eitt fjölmennasta samfélag landsins sem hefur sett sig í lið umhverfisverndar,“ segir þar.
