Hörmuleg tíðindi að íslamskir vígamenn hafi myrt nær 300 manns

Forseti Íslands, hr. Guðni Th. Jóhannesson, hefur sent forseta Sri Lanka samúðarkveðjur fyrir hönd íslensku þjóðarinnar, eftir hin hrikalegu tíðindi gærdagsins þar sem ráðist var á kirkjur kristinna manna að morgni páskadags og einnig hótel þar sem gestkomandi dvöldu í borginni Colombo um bænadagana.

„Páskarnir eiga að bera með sér boðskap friðar og kærleika. Því hörmulegri voru tíðindin frá Sri Lanka, að íslamskir vígamenn hefðu myrt nær 300 manns í sjálfsvígsárásum á kirkjur og aðra staði,“ segir forseti Íslands.

„Ég sendi forseta landsins samúðarkveðjur fyrir hönd íslensku þjóðarinnar. Sæmilegur friður hefur ríkt í Sri Lanka í nær áratug, eftir blóðuga borgarastyrjöld árum saman. Vonandi blossar ekki upp óöld á ný í þessu fallega landi. Sú skylda hlýtur að hvíla á veraldlegum og andlegum leiðtogum þar að stilla til friðar og mæla ofbeldi aldrei bót,“ bætir hann við.