„Við tökum við nýjum nemendum. Varðandi rafræna kennslu, þá erum við að skoða málin og fylgjumst náið með hvað er að gerast erlendis,“ segir Jón Atli Benediktsson, rektor Háskóla Íslands, í samtali við Viljann aðspurður um áhrif kórónuveirufaraldursins á skólastarfið á haustmisseri.
Víða erlendis hafa stjórnendur háskóla boðað fjarkennslu fram að áramótum í þeirri von að mesta hættan af covid-19 verði þá um garð gengin.
Jón Atli segir Háskóla Íslands ekki kominn á þann stað að geta fullyrt hvernig kennslan verður í haust.
„Það mun væntanlega skýrast á næstu vikum og mánuðum,“ segir hann.
Skólastarf víða um heim hefur verið með gjörbreyttu sniði undanfarnar vikur vegna veirufaraldursins. Flestir menntaskólar og háskólar eru lokaðir, en boðið upp á fjarkennslu gegnum Netið. Víða er enn óvíst hvernig námsmati verður háttað í vor, hvort hefðbundin áhersla verður lögð á lokapróf eða fremur horft til námsmats yfir önnina.
