Tæknirisinn Google virðist vera með áætlanir um að stýra niðurstöðum forsetakosninganna í Bandaríkjunum árið 2020. Fyrirtækið notar algórithma og gervigreind til að „fréttastýra“ fjölmiðlum og öðru efni á netinu. Uppljóstrari sem veitti fréttamanni hjá miðlinum Project Veritas viðtal upplýsti um það, en meðfram þeim upplýsingum var leynileg upptaka af hátt settum yfirmanni hjá Google, Jen Gennai, sem staðfestir það sem hann hafði að segja um fyrirtækið.
Gennai er yfirmaður „ábyrgra uppfinninga (e. Responsible Innovation)“ hjá fyrirtækinu, deild sem vakir yfir og metur ábyrga uppsetningu á gervigreindartækni. Í myndbandinu segir hún að Google hafi unnið staðfastlega að því að koma í veg fyrir að niðurstöður forsetakosninganna í Bandaríkjunum árið 2016, þegar Donald Trump varð forseti, endurtaki sig árið 2020:
„Við vorum svikin árið 2016, en ekki bara við, einnig almenningur, fjölmiðlar, og allir þannig að við höfum verið að velta fyrir okkur hvað gerðist og hvernig komum við í veg fyrir að það gerist aftur.“
„Við erum líka að þjálfa algórithmana okkar, svona, ef 2016 yrði endurtekið, hefðum við, hefði niðurstaðan orðið önnur“?
„Elizabeth Warren [þingmaður Demókrata] segir að það þurfi að brjóta upp Google. Mér finnst hún frábær en hún misskilur þetta, það mundi ekki gera neitt betra, það mundi gera hlutina verri, af því að öll litlu fyrirtækin sem ekki hafa sama bolmagn og við yrðu ásökuð um að koma í veg fyrir endurkjör Trump, lítil fyrirtæki geta það ekki.“
Við erum stórfyrirtæki og við ætlum að gera það
Project Veritas hafði fengið lekin leyniskjöl frá Google, sem innihalda upplýsingar um „réttlætis kennsluefni fyrir vélar (e. Machine Learning Fairness)“ og „algórithmískt óréttlæti (e. algorithmic unfairness)“ sem gervigreind reynir að fást við.
„Ástæða þess að við gáfum út gervigreindar-grunngildin var að fólk var ekki að draga línu í sandinn, það var ekki að segja réttláta og sanngjarna hluti þannig að við sögðum, jæja, við erum stórfyrirtæki og við ætlum að gera það“, sagði Gennai ennfremur í myndbandinu.
Um þetta hafði uppljóstrarinn að segja: „Þau ætla að endurskilgreina raunveruleikann á grunni þess sem þeim finnst vera réttlátt og á grundvelli þess sem þau vilja, og það er hluti af stefnu þeirra. Í skjölunum sem lekið var frá Google eru upplýsingar um það hvernig fyrirtækið skilgreinir og forgangsraðar efni frá mismunandi fréttaveitum og hvernig vörur Google birta efni þeirra. Eitt skjalið, kallað „Falsfréttabréfið“ útskýrir markmið Google um að vera með „sannleikann“ í öllum sínum vörum.
Annað skjal er teikning sem sýnir „fréttaumhverfið“ þar sem minnst er á „ritstjórnarleiðbeiningar“ sem virðast vera ákveðnar og settar í framkvæmd innan Google. Þessar aðferðir stjórna því hvernig efni er dreift og birt á síðunni þeirra. Gennai sést útskýra í myndbandinu hvernig „íhaldssamir miðlar“ og „marktækir miðlar“ séu ekki endilega settir í sama mengið.
Viljandi litla dreifingu og áhorf
Uppljóstrarinn varpaði einnig ljósi á það hvernig Youtube hefur viljandi séð til þess að myndbönd frá fréttamönnum og áhrifafólki sem þeim líkar ekki við fái litla dreifingu og áhorf:
„Youtube breytti niðurstöðum úr meðmælavél sinni. Það sem meðmælavél gerir, er að segja t.d. ef þér líkar við efni A, þá á þér líklega eftir að líka við efni B. Þannig að efni sem líkist Dave Rubin eða Tim Pool [íhalds fréttamenn], ætti að mæla með þeim. En í staðinn, þá kemur meðmælavélin með aðrar, vinstri sinnaðri fréttaveitur, eins og t.d. CNN eða MSNBC.“
Ennfremur lak skjal frá Google til Project Veritas, sem sýnir starfsmann fyrirtækisins kalla frjálshyggjumenn á borð við Dennis Prager og Ben Shapiro „nasista“. Skjalið sem var sent innan „gagnsæis og siðgæðis“- nefndar Google. Í því er stungið upp á að efni frá PragerU, Jordan Peterson og Ben Shapiro verði aftengt úr tillöguvirkninni á Google-síðunni.
