Sigmundur Davíð Gunnlaugsson, formaður Miðflokksins og fv. forsætisráðherra, vill að Ísland nýti fullveldisrétt sinn til að leita eigin samninga um kaup á bóluefni.
Í kvöldfréttum Stöðvar 2 sem sendar voru út í læstri dagskrá í fyrsta sinn í kvöld, kom fram að Ísland hafi skuldbundið sig til að kaupa bóluefni samkvæmt samningum Evrópusambandsins. Ekki sé hægt að kaupa bóluefni framhjá þeim samningum.
„Fréttir Stöðvar 2 staðfestu það sem ég óttaðist og velti upp í færslu fyrir tæpri viku. Ísland hefur skuldbundið sig til að fylgja ESB í kaupum á bóluefni og gera ekki eigin samninga. En eins og ég nefndi virðist ESB landið Þýskaland hafa gefist upp á klúðrinu og leitar nú eigin samninga. Það eigum við að gera líka,“ segir Sigmundur Davíð í færslu á fésbókinni.
Þórólfur Guðnason sóttvarnalæknir sagði í fréttum Stöðvar 2, að ekki sé mögulegt fyrir Ísland nú að ganga til samninga við önnur lyfjafyrirtæki en séu í samningum við Evrópusambandið.
„Ráðuneytið gerði samninga við Lyfjastofnun Evrópu. Samkvæmt þeim er Ísland skuldbundið til að kaupa bóluefni í samræmi við samningana. Það er jafnframt skuldbundið til að kaupa ekki bóluefni framhjá þeim samningum. Það er engin vinna í gangi að kaupa bóluefni framhjá þessum samningum,“ sagði sóttvarnalæknir.
