„Það ætti að vera nokkuð ljóst af niðurstöðu Mannréttindadómstóls Evrópu að Landsrétt þarf að skipa uppá nýtt, í heild sinni, með lögmætum hætti,“ segir Páll Rúnar M. Kristjánsson lögmaður.
„Til þess þurfum við að fá nýja lagasetningu sem tekst á við þessa stöðu og kemur áfrýjun dómsmála fyrir hjá Hæstarétti þar til leyst hefur verið úr þessu,“ segir hann.
Sveinn Andri Sveinsson lögmaður segir að dómur MDE frá í morgun hafi verið sprenging, sem þó hafi ekki komið algerlega á óvart.
„Nú þurfa íslenskir stjórnmálamenn að bretta upp ermar og eyða hratt þeirri ringulreið sem ríkir í íslensku dómskerfi. Það er fullkomlega ófært að áfrýjunardómstóll landsins, hinn nýi Landsréttur, hangi í lausu lofti. Það verður að ýta pólitísku þrasi til hliðar þegar sjálft réttarríkið er undir,“ segir hann.
