Seðlabankinn birti nú kl. 16 margboðaða skýrslu um afdrif og ráðstöfun svonefnds neyðarláns sem Kaupþing fékk þann 6. október 2008. Er hana að finna hér.
Lán Seðlabankans var greitt inn á reikninginn 6. október 2018. Aðrar inngreiðslur á reikninginn námu samtals 698 milljónum evra. Staðan í upphafi dags 6. október var neikvæð um sem nemur 387 milljónum evra.
Útgreiðslur af evrureikningi félagsins frá þeim tímapunkti og til dagsloka 8. október 2008 voru sem hér segir (samandregið):
• Útgreiðslur til innstæðueigenda í Kaupþing EDGE að fjárhæð 225 m. evra.
• Greiðsla til norræns seðlabanka að fjárhæð 170 milljónir evra.
• Greiðsla til tveggja erlendra félaga að fjárhæð 50 milljónir evra vegna útgáfu CLN (e. credit linked note) skuldabréfa.
• Greiðsla vegna veðkalls í tengslum við endurkaupasamning (REPO) til tveggja evrópskra banka að fjárhæð 47 milljónir evra.
• Greiðslur vegna gjaldeyrisviðskipta að fjárhæð 203 m. evra.
• Smágreiðslur (lægri en 10 milljónir evra), 4 – 500 talsins, í heild að fjárhæð 114,5 milljónir evra.
Samtals námu útgreiðslur 810 milljónum evra og staðan á reikningi félagsins í dagslok 8. október 2008 nam 0,6 milljónum evra.
Ekki er mögulegt að draga einhlítar ályktanir um ráðstöfun þrautarvaraláns Seðlabankans á grundvelli ofangreindra upplýsinga, segir í skýrslunni.
Þær sýni þó að á þessum tíma var verið að inna af hendi greiðslur sem ella hefðu líklega leitt til falls bankans. Færslurnar beri með sér að áhlaup er í gangi á innstæður og önnur fjármögnun er að verða erfiðari sem lýsir sér í veðköllum sem væntanlega tengjast veð- og endurkaupasamningum.
Samtals nema greiðslur til norræns seðlabanka, útstreymi á innstæðum og greiðslur vegna veðkalla 442 milljónum evra. Vegna greiðslna í tengslum við CLN skuldabréfið megi nefna að málið er ennþá til meðferðar hjá dómstólum. Ekki sé heldur hægt að draga miklar ályktanir af upplýsingum um fjárhæð gjaldeyrisviðskipta og mótaðila í þeim viðskiptum. Gera megi ráð fyrir að þær færslur hafi þegar verið skoðaðar af þar til bærum aðilum.
