Katrín Jakobsdóttir forsætisráðherra segist telja að tillögur ríkisstjórnarinnar í skattamálum geti skipt verulegu máli fyrir allan almenning, enda þótt þær hafi fengið dræm viðbrögð hjá verkalýðsforystunni í gær.
Forsætisráðherra sagði í morgunþætti RÚV í morgun, að ríkisstjórnin hafi alltaf sagt að svigrúmið til skattkerfisbreytinga gagnvart aðilum á vinnumarkaði kæmi fram í fjármálaáætlun sem lögð hefði verið fram fyrir um ári síðan og það standi. Þetta sé það svigrúm sem hægt sé að vinna með og aldrei hafi staðið til að setja á hátekjuskatt.
Hún segir að um sé að ræða risavaxna innspýtingu upp á 30 milljarða á þremur árum. Átak sé gert í húsnæðismálum, skattkerfið lagfært og gert réttlátara, fæðingarorlof lengt í 12 mánuði og margt fleira, til dæmis standi til að draga úr áhrifum verðtryggingar.
Það var þungt hljóðið í formönnum landssambanda og stærstu félaga innan Alþýðusambandsins eftir fund í gær þar sem forseti ASÍ, Drífa Snædal, kynnti hugmyndir ríkisstjórnarinnar til að liðka fyrir gerð kjarasamninga.
Forsetateymi ASÍ, Drífa auk Vilhjálms Birgissonar og Kristjáns Þórðar Snæbjarnarsonar, átti í gærmorgun fund með formönnum stjórnarflokkana auk félagsmálaráðherra þar sem farið var yfir mögulegt innlegg ríkisstjórnarinnar.
Drífa Snædal forseti ASÍ lýsti deginum svona á Facebook síðu sinni:
„Dagur vonbrigða í dag þegar við fengum kynningu á skattatillögum stjórnvalda.
- Skattalækkun upp allann stigann (enginn að kalla eftir skattalækkun á hæstu tekjuhópana).
- Sennilega frysting persónuafsláttar í nokkur ár (raunlækkun persónuafsláttar).
- Ekkert meira inn í barnabóta- og húsnæðiskerfin en komið er (Fjármagn í barnabætur hafa ekki náð raungildi ársins 2010).
- Enginn hátekjuskattur eða hækkun á auðlindagjöldum og fjármagnstekjuskatti (Tekjuöflun engin).
- Skattalækkun á þá hópa sem enn ná ekki endum saman dugar varla fyrir einni ferð í Bónus og sú lækkun á að koma einhverntíman á næstu þremur árum.
Niðurstaðan: Þetta verður ekki til að liðka fyrir kjarasamningum.“
