Áslaug Arna Sigurbjörnsdóttir dómsmálaráðherra hefur tilkynnt að ferðatakmarkanir sem tóku gildi þann 20. mars sl. verði framlengdar til 15. maí nk.
Frá þessu greinir á vef dómsmálaráðuneytisins. Umfang takmarkananna er óbreytt og verður því útlendingum, sem hvorki eru EES- né EFTA-borgarar, áfram óheimilt að koma til landsins nema þeir geti sýnt fram á að för þeirra sé vegna brýnna erinda.
Ríkisborgarar Schengen svæðisins og aðstandendur þeirra munu áfram geta komið óhindrað inn á svæðið og er sérstaklega kveðið á um að útlendingar sem hafa dvalar- eða búseturétt innan svæðisins eigi einnig rétt á að koma. Þá eru ákveðnar starfsstéttir undanþegnar takmörkunum, þ. á m. starfsfólk á sviði heilbrigðisþjónustu og þeir sem sinna farmflutningum.
Framkvæmdastjórn Evrópusambandsins gaf út tilmæli þann 8. apríl sl. til aðildarríkja sambandsins og Schengen samstarfsins um að draga áfram úr ferðum fólks inn á Schengen svæðið til 15. maí nk. í því skyni að hægja á útbreiðslu kórónaveirunnar.
Nauðsynlegt sé þannig að framlengja þær aðgerðir sem þegar hefur verið gripið til svo að hægt sé að ná stjórn á útbreiðslu COVID-19. Þær aðgerðir nái aðeins tilgangi sínum að öll aðildarríki taki þátt og að gildistími takmarkananna sé hinn sami.
Nánari upplýsingar um tilhögun og framkvæmd takmarkananna má finna á heimasíðu Útlendingastofnunar.
Hér má finna fyrri fréttatilkynningu ráðuneytisins um ferðatakmarkanir.
