Smám saman er stefnuskrá Sósíalistaflokksins fyrir komandi kosningar að líta dagsins ljós. Nú um verslunarmannahelgina kynnti flokkurinn það sem hann kallar sjöunda tilboð sitt til kjósenda og ber það yfirskriftina: „Burt með elítustjórnmál“.
- Þingmenn Sósíalista munu lækka laun sín með því að gefa hluta þeirra til Vorstjörnunnar
- Aðstoðarfólk þingflokks sósíalista mun starfa fyrir hreyfingu almennings, ekki aðeins þingflokkinn
- Styrkir til Sósíalistaflokksins verða notaðir til að byggja upp hreyfingu hinna fátæku, ekki flokkinn
- Sósíalistar munu lækka laun kjörinna fulltrúa við fyrsta tækifæri
- Sósíalistar munu leggja af ofurstyrki elítuflokkanna við fyrsta tækifæri
- Sósíalistar munu leggja af ráðherrabíla, einkabílstjóra og allt slíkt snobb og tildur. Stjórnmálafólk eru þjónar, ekki herrar
Þess má geta, að Vorstjarnan sem þarna er nefnd til sögunnar, er styrktarsjóður á vegum Sósíalistaflokksins sem styður hin verr settu í að byggja upp og reka hagsmunabaráttu sína í skipulögðum hópum, félögum og samtökum.
