Flugfélagið WOW air verður tekið til gjaldþrotaskipta í Héraðsdómi Reykjavíkur á eftir. Þá verða jafnframt skipaðir skiptastjórar yfir búinu, tveir í þessu tilfelli vegna stærðar félagsins.
Fréttablaðið skýrði frá þessu fyrr í dag og hafði eftir öruggum heimildum að það verði verkefni hæstaréttarlögmannanna Sveins Andra Sveinssonar og Þorsteins Einarssonar að skipta búinu.
Sveinn Andri hefur staðfest þetta í samtali við Viljann.
Ljóst er að þrotabú WOW air er gríðarlega stórt og umfangsmikið, enda hefur komið fram að skuldirnar séu vel á þriðja tug milljarða króna og starfsmenn yfir eitt þúsund talsins.
Þetta er því klárlega eitt stærsta — ef ekki stærsta — þrotabú sem þarf að vinna úr frá því í hruninu.
