Ætlar að koma Má Guðmundssyni og fleirum innan Seðlabankans í fangelsi

Már Guðmundsson fv. seðlabankastjóri og formaður Peningastefnunefndar bankans veitti hinn umdeilda styrk.

Stjórnendur Samherja hyggjast kæra Má Guðmundsson seðlabankastjóra og nokkra fleiri lykilstjórnendur bankans persónulega til Héraðssaksóknara fyrir brot í opinberu starfi, meðal annars rangar sakargiftir. Málið hefur lengi verið í undirbúningi, en með dómi Hæstaréttar í gær, þar sem málatilbúnaði Seðlabankans gegn Samherja var endanlega hafnað eftir margra ára rannsókn, ákærumeðferð og deilur fyrir dómstólum, hefur verið ákveðið að láta til skarar skríða. Þetta hefur Viljinn eftir öruggum heimildum. Forstjóri Samherja segir Seðlabankastjóra eiga að víkja, enda sé hann á leið í fangelsi.

„Það er alveg ljóst að Már Guðmundsson hefur farið mjög illa með það vald sem honum hefur verið trúað fyrir,“ segir Þorsteinn Már Baldvinsson, forstjóri Samherja í samtali við Vísi í dag.

Dóm Hæstaréttar um stjórnvaldssekt Seðlabankans á hendur Samherja vegna brota á reglum um gjaldeyrismál er að finna hér, en með honum var staðfest niðurstaða Héraðsdóms.

Stjórnendur Samherja telja einsýnt að Már Guðmundsson hafi ásamt undirmönnum sínum gerst sekur um refsiverða háttsemi. Þeir hafi farið af stað með algjörlega vanreifað mál sem hafi verið stoppað ítrekað af ákæruvaldinu, en alltaf hafi því verið haldið áfram. Seðlabankastjóri hafi ítrekað rætt málið í fjölmiðlum, meðal annars aftur og aftur í sjónvarpsþættinum Eyjunni á Stöð 2, og sagt þar berum orðum að Samherji hefði aðeins sloppið við ákæru vegna tæknilegra vankanta við birtingu laga og reglugerða.

Stjórnendur Samherja sendu sérstakt erindi til bankaráðs Seðlabankans vegna viðtala við Seðlabankastjóra í Eyjunni á Stöð 2 og fóru fram á að hann hætti að tjá sig með þessum hætti um málið. Hann varð ekki við þeim tilmælum.

Ábyrgð bankaráðsins mikil

Bankaráð Seðlabankans hafi látið hjá líða að grípa inn í þegar ljóst var orðið fyrir löngu að ekkert stæði eftir í málatilbúnaði bankans, en það hafi ekki verið gert. Þess í stað hafi stjórnendur Seðlabankans neitað að horfast í augu við staðreyndir og lagt á 15 milljóna króna sekt vegna meintra brota á gjaldeyrisreglum og nú hafi sú sekt einnig verið felld niður með dómi Hæstaréttar.

Þorsteinn Már Baldvinsson, forstjóri Samherja.
Á heimasíðu Samherja birta stjórnendur fyrirtækisins bréf til starfsmanna, þar sem þeir segja fullnaðarsigur hafa unnist. „Með þessum dómi lýkur endanlega tæplega sjö ára aðför Seðlabankans á hendur Samherja. Öllum fullyrðingum og ásökunum Seðlabankans á hendur Samherja og starfsfólki okkar hefur verið hnekkt og bankinn beðið afhroð.
Okkur er efst í huga þakklæti til ykkar kæru starfsmenn.  Þið sem hafið staðið þétt við bakið á okkur í gegn um árin. Það er þungbært að sitja undir ásökunum jafn valdamikillar stofnunar og Seðlabanka  Íslands.  Með slíkum þunga getur verið auðvelt að brjóta niður samstöðu fólks. Takk kæru starfsmenn fyrir stuðninginn og alla vinnuna sem þið hafið lagt á ykkur. Við viljum líka þakka fyrir að þið misstuð aldrei trúna á okkur og að við höfum lagt okkur fram um að vinna störf okkar í samræmi við lög og reglur. Við unnum ásamt ykkur heiðarlega og samviskusamlega að rekstri okkar fyrirtækis á tímum sem eiga sér ekki hliðstæðu á Íslandi.   Samstaða ykkar hjálpar okkur að halda áfram þegar að okkur er sótt,“ segir í bréfinu.
Þorsteinn Már segir í samtali við Vísi, að rangar sakargiftir séu refsiverðar. Hann hafi farið yfir málið með lögmönnum. „Ég held að það sé nokkuð ljóst að Már Guðmundsson er á leiðinni í fangelsi.“
Hann segir útilokað annað en bankaráð Seðlabankans bregðist nú við og reki Má Guðmundsson úr embætti. „Mér fyndist það ótrúlegt ef að fólk ætli að sitja uppi með mann til að stjórna Seðlabanka Íslands sem er á leið í fangelsi,“ segir Þorsteinn Már í samtali við Vísi.