Það er með ólíkindum hvað fjölmiðlar hafa lítið fjallað um frétt Stundarinnar eftir að lögbanni var aflétt um fjármál og virkan þátt Bjarna Benediktssonar í að stýra eða koma að fjárfestingum fjölskyldu sinnar upp á 130 milljarða kr.
Þetta segir Jóhanna Sigurðardóttir, fv. forsætisráðherra. Hún bendir á að öll fyrirtækin séu gjaldþrota eða hafi verið yfirtekin af kröfuhöfum.
„Afskriftirnar eru í samræmi við það. Bjarni og hans fjölskylda hafði sem sagt allt sitt á þurru meðan almenningur tapaði fúlgum frjár í hruninu,“ segir Jóhanna og undrast að Katrín Jakobsdóttir forsætisráðherra hafi komið Bjarna í skjól á þingi í gær þegar Logi Einarsson, formaður Samfylkingarinnar, tók málið upp.
„Erlendis væri fjármálaráðherra með þessa fortíð löngu farinn frá og ítarleg rannsókn sett í gang. Ætlar stjórnarandstaðan að gera eitthvað í málinu, krefjast umræðu og rannsóknar á þessu, eða ætlar hún að þegja eins og flestir fjölmiðlar? Þetta mál er hneyksli og á ekki að líðast,“ segir Jóhanna Sigurðardóttir.
