Það er einstakt í Íslandssögunni að heilt bæjarfélag hafi verið rýmt með litlum fyrirvara og verðir standi nú við lokunarpósta og gæti þess að hleypa engum inn, enda verulegar líkur á öflugu eldgosi í eða við Grindavík. Fjölmargir Grindvíkingar fóru í flýti á brott, jafnvel án gæludýra sinna, og velta eðlilega fyrir sér hvenær eða hvort færi gefst á að bjarga því sem bjargað verður áður en hamfarirnar dynja yfir.
Í ljósi þessa verður að teljast alveg ótrúlegt frumhlaup hjá Veðurstofunni að hafa sent út tilkynningu í morgun á fjölmiðla þar sem tilkynnt var „sameiginlegt mat stöðufundar Veðurstofunnar, Almannavarna og sérfræðinga Háskóla Íslands er að íbúar Grindavíkur megi sækja nauðsynjar.“
Í tilkynningunni sagði ennfremur að það væri sameiginlegt mat „fundarins út frá nýjustu gögnum“ að svigrúm sé til tímabundinna aðgerða á vegum almannavarna til að sækja nauðsynjar fyrir íbúa og sinna brýnum erindum í Grindavík og nágrenni.
Grindvíkingar brugðust eðlilegt skjótt við og fjölmenntu á svæðið, ásamt skyldmönnum og vinum á stórum bílum, til að bjarga verðmætum. En það reyndist vera fýluferð á kostnað fólks sem alls ekki má við slíku á þessum tímapunkti, eins og allir hljóta að skilja.
Eftir hádegi kom tilkynning frá Almannavörnum um að íbúum í Þórkötlustaðahverfi í Grindavík væri einungis heimilt að sækja gæludýr og ómissandi eigur sínar. Um væri að ræða „skipulagða og stýrða aðgerð undir stjórn lögreglunnar. Heimildin nær eingöngu til þessa tiltekna hverfis, ekki annarra hverfa eða svæða í Grindavík, en auk þess væri sérstök aðgerð í gangi til þess að sækja alla hesta í hestahverfinu norðan við Austurver.
„Við ítrekum við aðra íbúa að keyra alls EKKI í átt að Grindavík og ekki safnast saman á lokunarpóstum. Íbúar í Þórkötlustaðahverfi sem fá að fara inn til Grindavíkur fara ekki þangað á eigin bílum. Íbúar sem fá að fara inn í til Grindavíkur eiga að koma á söfnunarstaðinn sem er bílastæðið við gossvæðið, við Fagradalsfjall,“ sagði í tilkynningunni og lögreglustjórinn á Suðurnesjum sagði þungbrýnn í beinni útsendingu í sjónvarpinu að tilkynning Veðurstofunnar hefði verið „óheppileg“ og tilkynningar eða ákvarðanir af þessu tagi gætu einungis komið frá Almannavörnum, ekki öðrum.
Á válegum tímum sem þessum er mikilvægara en nokkru sinni að aðgerðir yfirvalda séu samræmdar og skilaboð skýr. Að Veðurstofan skuli hafa tekið að sér að bjóða skelkuðum Grindvíkingum aftur heim til að sækja verðmæti og annað með tilfinningalegt gildi, án þess að innistæða hafi verið fyrir því, er frumhlaup af alvarlegu tagi og vonandi eitthvað sem ekki endurtekur sig.
Það má enginn tala í nafni Almannavarna nema Almannavarnir sjálfar. Það ætti raunar alls ekki að þurfa að taka sérstaklega fram.
