Verður lengi minnst á Íslandi fyrir þrekvirkið EES: Jón Baldvin áttræður

„Elsku pabbi minn. Ég vil vera sú fyrsta til að óska þér til hamingju með afmælið. Áttræður. Ekki svo mikið þegar þú átt í hlut. Þú ert ungur að eilífu þótt kroppurinn gefi eftir, kannski. Þinn kraftur og þitt energí. Þín hlýja og gjafmildi. Þinn húmor og kímni. Þínar gáfur og skipulag. Þitt framlag og stefna. Þín ást og gleði. Þín þrjóska og einurð. Þín jafnaðarmennska að eilífu. Ég er ein af þeim. Bara brosa, sagðir þú ævinlega við mig þegar eitthvað bjátaði á hjá mér, og ég þakka þér fyrir að kenna mér þau einkunnarorð.“

Þannig hljómar afmæliskveðja Kolfinnu Baldvinsdóttur á fésbók í morgun í tilefni þess að faðir hennar, Jón Baldvin Hannibalsson, fv. utanríkisráðherra, sendiherra og formaður Alþýðuflokksins, fagnar áttræðisafmæli í dag.

Ekki þarf að rekja storminn kringum Jón Baldvin undanfarnar vikur, hann hefur legið undir þungum sökum um ósæmilega hegðun í garð fjölmargra kvenna, en hann er engu að síður einn litríkasti og áhrifamesti stjórnmálamaður í seinni tíma sögu hér á landi.

Jakob Frímann Magnússon, Stuðmaður og athafnamaður, sendir vini sínum afmæliskveðju í Morgunblaðinu í morgun og segir:

„Fáa menn veit ég jafn leiftrandi greinda, lit­ríka og skemmti­lega. Sann­ar­lega öngv­an er lagt hef­ur jafn­gjörva hönd á að skapa for­send­ur hins auðuga ís­lenska vel­ferðarsam­fé­lags sem aldrei hef­ur staðið í jafn­mikl­um blóma og ein­mitt nú. Þökk sé öt­ulli og ein­beittri bar­áttu hans fyr­ir þeim kosta­kjör­um sem inn­gang­an í EES, Evr­ópska efna­hags­svæðið, færði okk­ur um miðjan tí­unda ára­tug síðustu ald­ar.

Jóns Bald­vins verður lengi minnst á Íslandi fyr­ir það póli­tíska þrek­virki. Að sama skapi er hans hlý­lega minnst í öðrum lönd­um sem hins djarf­huga stjórn­mála­manns er fyrst­ur steig fram til at­fylg­is balt­nesku þjóðunum í tví­sýnni bar­áttu þeirra fyr­ir frelsi og langþráðu, end­ur­heimtu sjálf­stæði.
Und­ir ógn­andi hót­un­um Rússa hvikaði ut­an­rík­is­ráðherr­ann Jón Bald­vin hvergi og bauð hinni vígreifu gömlu komm­ún­istaþjóð birg­inn án þess að blikna.

Með ein­stöku ís­lensku orðfæri mæl­ir hann jafn­an óhrædd­ur og tæpitungu­laust. Eft­ir hann liggja ótal snjall­ar rit­gerðir, grein­ar og bæk­ur. Að minnsta kosti tveggja nýrra rit­verka eft­ir hann er að vænta á þessu ári.

Það hef­ur ósjald­an gustað um Jón Bald­vin Hanni­bals­son og senni­lega aldrei sem nú. Í eðli sínu er Jón þó friðar­ins maður,“ segir Jakob Frímann ennfremur.

Langur stjórnmálaferill

Jón Baldvin Hannibalsson er fæddur á Ísafirði 21. febrúar 1939. Foreldrar: Hannibal Valdimarsson (fæddur 13. janúar 1903, dáinn 1. september 1991) alþingismaður og ráðherra, bróðir Finnboga R. Valdimarssonar alþingismanns, og kona hans Sólveig Ólafsdóttir (fædd 24. febrúar 1904, dáin 11. maí 1997) húsmóðir. Bróðir Ólafs Hannibalssonar varaþingmanns.

Maki (26. september 1959): Bryndís Schram (fædd 9. júlí 1938) framkvæmdastjóri, systir Ellerts B. Schrams alþingismanns. Foreldrar: Björgvin Schram og kona hans Aldís Þ. Brynjólfsdóttir.

Börn: Aldís (1959), Glúmur (1966), Snæfríður (fædd 1968, dáin 2013), Kolfinna (1970).

Stúdentspróf MR 1958. MA-próf í hagfræði frá Edinborgarháskóla í Skotlandi 1963. Framhaldsnám í vinnumarkaðshagfræði við Stokkhólmsháskóla 1963–1964. Próf í uppeldis- og kennslufræðum HÍ 1965. Framhaldsnám við Harvard-háskóla (Center for European Studies) í Bandaríkjunum 1976–1977.

Kennari í Hagaskóla í Reykjavík 1964–1970. Blaðamaður við Frjálsa þjóð 1964–1967. Skólameistari Menntaskólans á Ísafirði 1970–1979. Ritstjóri Alþýðublaðsins 1979–1982. Skipaður 8. júlí 1987 fjármálaráðherra, lausn 17. september 1988, en gegndi störfum til 28. september. Skipaður 28. september 1988 utanríkisráðherra, lausn 23. apríl 1991, en gegndi störfum til 30. apríl. Skipaður 30. apríl 1991 utanríkisráðherra, lausn 18. apríl 1995, en gegndi störfum til 23. apríl. Sendiherra Íslands í Bandaríkjunum 1998–2002 og í Finnlandi 2002–2005.

Alþingismaður Reykvíkinga 1982–1998 (Alþýðuflokkur).

Varaþingmaður Vestfirðinga janúar–febrúar 1975 (Samtök frjálslyndra og vinstri manna) og nóvember–desember 1978, varaþingmaður Reykvíkinga mars–apríl 1980, mars–apríl 1981 og apríl–maí 1982 (Alþýðuflokkur).

Fjármálaráðherra 1987–1988, utanríkisráðherra 1988–1995.