„Aukaatriði í málinu“

Arnar Þór Jónsson héraðsdómari. / RAX.

Innkoma Arnars Þór Jónssonar héraðsdómara inn á leikvöll stjórnmálanna hefur vakið mikla athygli, enda ekki á hverjum degi sem fulltrúi dómsvaldsins stígur slíkt skref.

Jón Þórisson, lögmaður og ritstjóri Fréttablaðsins, er ekki hrifinn af því framtaki dómarans að segja sig ekki um leið frá dómarastörfum og bendir á í leiðara blaðsins á dögunum, að þrí­greining ríkis­valds sé mjög þýðingar­mikil og raunar grund­völlur stjórn­skipunarinnar.

„Því er verið að rekja þetta að nú hefur héraðs­dómari einn á­kveðið að gefa kost á sér í próf­kjöri stjórn­mála­flokks með það fyrir augum að verða á fram­boðs­lista hans í komandi al­þingis­kosningum. Það er fremur sjald­gæf staða og gefur til­efni til að staldra við og í­huga hvað það í reynd þýðir þegar maður með dóms­vald hyggst láta reyna á fylgi sitt og freista þess að komast á þing,“ segir Jón í leiðaranum og bætir svo við heldur óvenjulegri pillu: Nú bendir reyndar margt til þess að það muni honum ekki takast en það er auka­at­riði í málinu.“

Sannarlega er ekki algengt að einstakir frambjóðendur í prófkjörum stjórnmálaflokkanna fái slíka spádóma um sig í leiðurum íslenskra dagblaða, en Jón gengur lengra og segist beinlínis amast við skrifum dómarans um samfélagsmál.

„Það er á­stæða til að amast við þessum skrifum dómarans. Auð­vitað hefur hann rétt til að tjá sig en þegar hann sóttist eftir dómara­em­bætti vissi hann eða mátti vita að em­bættis­færslan setti honum skorður og tak­markaði frelsi hans. Þátt­taka dómarans í um­ræðu um sam­fé­lags­mál­efni hefur bent til að hann hefði í hyggju að láta frekar til sín taka á þeim vett­vangi. Á­formin um próf­kjörs­fram­boð komu því ekki alls kostar á ó­vart.

Haft hefur verið eftir dómaranum að hann hyggist fara í leyfi á meðan á fram­boðinu stendur. Ekki er að skilja annað en að hljóti hann ekki við­unandi fram­göngu í bar­áttunni um sæti á lista muni hann snúa úr leyfinu og taka til við að dæma á ný.

Jón Þórisson ritstjóri Fréttablaðsins.

Þetta er ó­fært. Dómarinn verður að gera upp við sig hvort hann vill búa til lög eða dæma eftir þeim. Undir hann sem dómara verða borin á­lita­efni og við megum ekki við því að til­efni sé gefið til að efast um ó­hlut­drægni hans, hvort sem það er undir rekstri máls fyrir dómi, eða þegar niður­staða er fengin,“ segir ritstjórinn ennfremur.

Ekki er að sjá að Arnar Þór hafi miklar áhyggjur af þessum leiðaraskrifum Fréttablaðsins, alltént heldur hann prófkjörsbaráttu sinni af fullum krafti áfram þessa dagana. Sagt er að árangur hans verði ákveðinn mæling á raunverulegum styrk andstæðinga orkupakka þrjú innan Sjálfstæðisflokksins og hve stór hluti flokksmanna er ósáttur við framgöngu flokksins í þeim málum.