„Nú ber nýrra við á hinu háa Alþingi, fregnir berast af því að þingmenn hlaðnir eldmóði að klára þriðja Orkupakkann rífist við gesti sína og skammi þá fyrir að hafa móðgað sig með röngum skoðunum að þeirra mati. Sú var tíðin að mikilvægt þótti eins og enn í nefndarstarfi Alþingis að fá fram með- og mótmælendur til að fjalla um kost og löst á þingmálum. Muni ég þetta rétt komu gestir og fluttu sitt mál og sátu svo og svöruðu oft skeleggum spurningum þingmanna um málið en öll efnisleg umræða eða rökræða fór fram milli þingmanna eftir að gestir hurfu af fundi. Nú berast fregnir af því að nánast sé ráðist að gestum með svigurmælum, þeir sagðir móðga háttvirta þingmenn með „heimsku“ sinni og það sé andstyggilegt að hlusta á málflutning þeirra. Svona framkoma er ekki boðleg en um þetta hafa borist fréttir í sumar og þingmenn ráðist að gestunum í fjölmiðlum eftir fundina eða á fasbókinni. Þetta eflir ekki virðingu Alþingis eða auðveldar þá mikilvægu vinnu sem Alþingi er falin, að hlusta á öll rök með og móti og leiða mál til lykta. Framkoma af þessu tagi ber vott um skort á sjáfsvirðingu og þá einnig sjálfstrausti því sá sem hefur það til að bera kemur ekki fram með þessum hætti.“
Þetta segir Guðni Ágústsson, fv. landbúnaðarráðherra og formaður Framsóknarflokksins, í grein í Morgunblaðinu í dag, en hann lýsir þar harðri andstöðu við áform meirihlutans á Alþingi (þar með talið Framsóknarflokksins) að samþykkja innleiðingu þriðja orkupakkans í atkvæðagreiðslu næstkomandi mánudag.
„Mig minnir að umdeild mál lentu oft í frysti og frekari vinnslu en nú er öldin önnur „vér einir vitum“ og umræðu er lokið og skítt með þjóðina, hún veit ekkert.
Þá kemur manni annað mál í hug, Icesave, megnið af þingheimi ályktaði gegn almannaviljanum þar og varð tvisvar undir í þjóðaratkvæðagreiðslu og svo vann Ísland málið fyrir EFTA-dómstólnum. Íslenska ríkið var sýknað af öllum kröfum ESA. Mikill meirihluti á Alþingi er því ekki vissa um sanngjarna niðurstöðu eða rétta, ekki einu sinni að niðurstaðan standist dómstólameðferð. Orkupakkamálið er svo vanreifað að það er skylda Alþingis að taka það til endurskoðunar, bæði vegna almannaviljans og ekki síður vegna þess að hina færustu sérfræðinga greinir á um afleiðingar málsins. Farsæll stjórnmálaleiðtogi keyrir aldrei svona umdeilt mál áfram.“
Guðni bætir því við að ca. 75% fólksins í landinu séu ósátt við málið og reiðin kraumi í ríkisstjórnarflokkunum eins og eldur í iðrum jarðar.
„Hvað gerist eftir 2. september n.k.? Verður niðurstaðan ögrun við þjóðina, lýðræðið og við almenna skynsemi. Stopp, kjörnir fulltrúar Alþingis, gefið tíma og andrúm!“
