Til stórra tíðinda gæti dregið á landsþingi Sambands íslenskra sveitarfélaga í Silfurbergi í Hörpu í dag, en margir sveitarstjórnarmenn víðsvegar að af landinu, segja að formaður sambandsins, Heiða Björg Hilmisdóttir, borgarfulltrúi Samfylkingarinnar, njóti ekki trausts alls sveitarstjórnarfólks.
Aðdragandi málsins felst í aðkomu sveitarfélaganna og sambandsins að kjarapakka ríkisstjórnarinnar sem kynntur var fyrir síðustu helgi. Eins og Viljinn hefur skýrt frá, hafði Katrín Jakobsdóttir forsætisráðherra skýra verksögn í málinu af hálfu stjórnvalda, en fyrir sveitarfélögin lék Heiða Björg lykilhlutverk.
Svo virðist sem samband hennar við umbjóðendur í sveitarstjórnum um land allt, hafi ekki verið mikið í þessari vinnu, því alls 26 oddvitar Sjálfstæðisflokksins af öllu landinu, fara þá óvenjulegu og hörðu leið að gagnrýna formann Sambands íslenskra sveitarfélaga í aðsendri grein í Morgunblaðinu í dag, sama dag og landsþingið hefst í Hörpu.
Segja oddvitarnir að Heiða Björg hafi beinlínis farið gegn vilja sveitarfélaganna í aðkomu sinni að kjarasamningum á almennum vinnumarkaði.
„Því var treyst að formaður myndi starfa samkvæmt eindregnum vilja sveitastjórna og bókun stjórnar og myndi upplýsa aðila vinnumarkaðarins og forsætisráðherra um afstöðuna með skýrum hætti. Ljóst er að svo var ekki,“ segja þeir og benda sérstaklega á ákvörðun um gjaldfrjálsar skólamáltíðir. Eins og Viljinn sagði frá í fyrri viku, er það upphaflega stefnumál VG og var orðað fyrst af forsætisráðherra á fundi með fulltrúum verkalýðshreyfingarinnar og eftir það varð það fljótlega að „ófrávíkjanlegu skilyrði“ verkalýðshreyfingarinnar fyrir því að kjarasamningar næðust.
Í greininni segja sveitarstjórnarmenn Sjálfstæðisflokksins, að meginkrafan á sveitarfélögin hefði frá upphafi snúið að hóflegum gjaldskrárhækkunum, en hugmyndir um gjaldfrjálskar skólamáltíðir hefðu fyrst verkið kynntar á fundi fyrir rúmum tveimur vikum. Það hefði komið flestum á óvart að sveitarfélögin væru allt í einu orðin lykilbreyta í kjaraviðræðunum og með þessum hætti. Andstaðan á fundinum hefði verið nær einróma og ekki einskorðast við Sjálfstæðisflokkinn.
Segja greinarhöfundar að komið hafi í ljós og þyngt brún þeirra enn frekar, að viðræður formannsins Heiðu Bjargar við ríkisvaldið hafi hafist strax í upphafi árs og framhaldið í lok janúar eða mánuði áður en sveitarstjórnarfólki var kynnt þessi hugmynd.
Á stjórnarfundi Sambandsins þann 1. mars sl., hafi enn verið mikil mótstaða meðal flestra sem tjáðu sig og það hafi komið fram í bókun þar sem hvatt var til þess að ríkisvaldið „leiti annarra leiða við að útfæra markmið um gjaldfrjálsar skólamáltíðir en beint í gegnum gjaldskrár sveitarfélaga. Stjórnin er reiðubúin til samtals um málið á breiðum grundvelli með það að leiðarljósi að tryggja barnafjölskyldum kjarabætur og velferð.“
Eftir þessu hafi hins vegar ekkert verið unnið; formaðurinn þannig gengið bæði gegn vilja sveitarstjórna og bókun stjórnar og þá hafi hún haldið því ranglega fram í fjölmiðlum að sátt ríkti um framkvæmdina.
Í lok greinar sinnar, segir að „afar mikilvægt“ sé að formaðurinn skýri aðkomu sína að kjarasamningsgerðinni á fundi dagsins í Hörpu.
