Hælisleitendum sem mótmæla á Austurvelli, ber líkt og öðrum að virða lög, reglur og skipanir lögreglu. Þetta segir Gunnar Bragi Sveinsson, formaður þingflokks Miðflokksins og fv. utanríkisráðherra í færslu á fésbókinni, en skoðanir eru skiptar um þá atburði er urðu á Austurvelli í gær, þegar skarst í odda með mótmælendum og lögreglu sem beitti piparúða til að ná tökum á ástandinu.
Logi Einarsson, formaður Samfylkingarinnar, hefur gagnrýnt lögregluna fyrir óþarfa ofbeldi og Kolbeinn Óttarsson Proppé, þingmaður Vinstri grænna, vill taka upp málið í þingnefnd.
Gunnar Bragi segir að formaður Samfylkingarinnar stilli sér upp með þeim sem óhlýðnast skipunum lögreglu, „sjálfsagt til að keppa við pírata um athyglina,“ eins og hann orðar það.
„ Lögreglan gerði vel að halda uppi reglu og ber að þakka lögreglumönnunum það,“ segir hann.
Einn af þeim sem taka undir með Gunnari Braga á fésbókinni er Júlíus Hafstein, fv. sendiherra og borgarfulltrúi.
Hann segir:
„Lögreglan á að stjórna og þegar mótmæli eru sett í gang ber að fara eftir ábendingum og ákvörðunum lögreglu. Lögreglan stóð sig vel í þessu verkefni en a m k sumir mótmælendur gengu of langt og fór ekki eftir ábendingum lögreglunnar. Því fór sem fór.“
Vilja fá áheyrn og tækifæri
Í yfirlýsingu sem skipuleggjendur mótmælanna í gær, hafa sent frá sér segir:
„Í gær klukkan 18:33 beitti lögreglan ofbeldi og piparúða gegn óvopnuðu fólki sem mótmælti meðferð flóttamanna í hælisferli á Íslandi. Komum og sýnum að fólk — óháð uppruna og útliti — standi saman gegn ofbeldi!
Piparúðanum var beitt þrátt fyrir að hælisleitendurnir hafi ítrekað sagt að þeirra eina ósk sé að fá áheyrn og tækifæri til að verða partur af samfélaginu — þar með talið að fá efnislega áheyrn mála sinna og rétt til vinnu.
Einu svörin hingað til hafa verið óljós loforð um samtal, auk lögreglukylfunnar og piparúðans.
Sláist með okkur í för og hrópið! Allar manneskjur hafa rétt til lífs! TAKIÐ TJÖLDIN MEÐ, TÓNLISTINA LÍKA, STÖNDUM OG SYNGJUM SAMAN!
—–
Fullur listi yfir kröfur:
- Ekki fleiri brottvísanir
2. Efnismeðferð fyrir alla. Niður með Dyflinnarreglugerðina
3. Réttur til að vinna
4. Jafn aðgangur að heilbrigðisþjónustu
5. Lokun einangruðu flóttamannabúðanna á Ásbrú
