„Úr fjarlægð sýnist mér í fljótu bragði að kjarasamningur ASÍ, Eflingar og VR við SA muni leiða til aukinnar verðbólgu og gengissigs af fjórum ástæðum,“ segir dr. Þorvaldur Gylfason, prófessor í hagfræði við Háskóla Íslands, í færslu sem hann ritar á fésbókina um helgina:
1) Sum fyrirtæki munu með gamla laginu velta auknum kaupkostnaði út í verðlagið frekar en að hagræða rekstri;
2) Mörg fyrirtæki munu líkt og fyrr leggjast í lántökur ef vextir lækka, og auknum lántökum fylgja aukin umsvif og verðhækkanir;
3) Aðgerðum ríkisins til að greiða fyrir samningunum fylgja útgjöld sem ýta undir eftirspurn og verðbólgu;
4) Önnur launþegasamtök, t.d. BSRB og iðnaðarmenn, kunna að krefjast enn frekari kauphækkunar án þess að slaka á klónni í ljósi vonar um lækkun vaxta.
Þorvaldur segir að þetta þurfi ekki að verða nein kollsteypa eins og t.d. 1977, „alls ekki, heldur bara verðbólga talsvert umfram markmið Seðlabankans í nokkur misseri eða ár — nema allt fari aftur í bál og brand. Kjararáð er ekki gleymt,“ bætir hann við.
