Dyggir lesendur Morgunblaðsins hafa líklega misst andlitið ofan í grautarskálina nú í morgun við lestur á Reykjavíkurbréfi dagsins, þar sem Davíð Oddsson ritstjóri og fv. forsætisráðherra og formaður Sjálfstæðisflokksins beinir spjótum sínum að Birni Bjarnasyni, aldavini sínum og helsta stuðningsmanni um áratugaskeið.
Björn er sonur fyrrverandi ritstjóra blaðsins (Bjarna fv. forsætisráðherra) og er líka fyrrverandi aðstoðarritstjóri Morgunblaðsins, skrifaði þar um árabil um erlend málefni og stjórnmál almennt, og hefur líklega aldrei fengið aðra eins sendingu frá gamla blaðinu sínu og í morgun.
Tilefnið er þriðji orkupakkinn sem nýlega var leiddur í íslensk lög með atkvæðagreiðslu á Alþingi. Björn er nú formaður nefndar á vegum utanríkisráðherra sem á að leggja mat á stöðu EES-samningsins, en hann gekk hart fram í umræðunni um orkupakkann og málsvörn sinni fyrir utanríkisráðherra.
Davíð skrifar í Reykjavíkurbréfi sínu að afstaða ríkisstjórnarinnar í orkupakkamálinu hafi verið „óframbærileg og niðurlægjandi“.
„Augljóst er að látið hefur verið undan hótunum sem hvergi hefur þó verið upplýst um hvaðan komu. Ríkisstjórnin sjálf viðurkenndi í raun að hún lyppaðist niður fyrir hótunum um að gerði hún það ekki væri EES-samningurinn úr sögunni. Ekkert í samningnum sjálfum ýtti þó undir þá niðurstöðu!“
Svo skrifar hann og beinir máli sínu að Birni Bjarnasyni:
„En vandinn er sá að þar sem þessi dusilmennska náði fram að ganga er stjórnskipulegur tilveruréttur EES-samningsins að engu gerður. Þeir sem fyrstir allra misstu fótanna í þessu máli eru augljóslega algjörlega vanhæfir til að leggja trúverðugt mat á stöðu EES-samningsins. Og breytir engu þótt þeir hafi nú verið í heilt ár hjá Guðlaugi Þór við að bera í bætifláka fyrir málatilbúnað hans.“
Þar til nýlega hefði þótt algjörlega óhugsandi að sjá slíka breiðsíðu á hendur Birni Bjarnasyni á síðum Morgunblaðsins.
Algjörlega óhugsandi.
