„Vonandi að það verði kveikt á sjónvarpinu á dvalarheimili aldraðra sjálfstæðismanna, sem eru harðastir í misskilningnum um orkupakkann.“
Þetta sagði Ólafur Stephensen, framkvæmdastjóri Félags atvinnurekenda, í færslu á fésbókinni þar sem hann vakti athygli á viðtali við Guðlaug Þór Þórðarson utanríkisráðherra á sjónvarpsstöðinni Hringbraut í vikunni.
Guðlaugur Þór sagði í viðtalinu að hann teldi afskaplega óskynsamlegt ef Ísland myndi ganga út úr samstarfinu um EES-samninginn. Bætti hann því við að útsendarar frá norska Miðflokknum, sem hafi þá stefnu að ganga út úr EES, séu eins og gráir kettir á Íslandi.
„Ef menn komast að þeirri niðurstöðu, sem ég held að væri afskaplega óskynsamlegt, að við vildum fara út úr EES, þá skulum við undirbyggja það mjög vel,“ sagði utanríkisráðherra.
Eins og Viljinn hefur rækilega fjallað um undanfarnar vikur og mánuði er mikil andstaða við innleiðingu þriðja pakkans í flestum stjórnmálaflokkum, utan Viðreisnar og Samfylkingarinnar. Miðflokkurinn er alfarið á móti innleiðingunni, Píratar hafa ekki tekið afstöðu til málsins, en innan stjórnarflokkanna eru skoðanir mjög skiptar.
Miðstjórn Framsóknarflokksins ályktaði þannig gegn innleiðingunni á haustfundi sínum og vill fá undanþágu frá raforkupakkanum. Margir þingmenn Sjálfstæðisflokksins hafa lýst efasemdum um innleiðinguna og þeim fer einnig fjölgandi innan VG sem setja spurningamerki við málið.
Það kemur í hlut Guðlaugs Þórs sem utanríkisráðherra og Þórdísar Kolbrúnar Reykfjörð Gylfadóttur iðnaðarráðherra að mæla fyrir þingsályktun og frumvörpum um innleiðingu orkupakkans á þingi og er gert ráð fyrir að það verði í næsta mánuði.
