Helga Vala Helgadóttir, þingmaður Samfylkingarinnar fyrir Reykjavík norður, hyggst láta af þingmennsku og snúa sér að lögmennsku á nýjan leik. Þetta er meðal þess sem fram kemur í forsíðuviðtali við Helgu Völu í Sunnudagsblaði Morgunblaðsins.
Helga Vala hefur setið á þingi frá hinum óvæntu þingkosningum árið 2017 og var m.a. formaður þingflokks Samfylkingarinnar árin 2021-2022. Samkvæmt heimildum Viljans hefur gustað í samstarfi hennar og nýs formanns flokksins, Kristrúnar Frostadóttur.
Helga Vala segir að lögmennskan hafi togað ákafar í sig undanfarið ár og hafnar því að deilur við Kristrúnu Frostadóttur, nýjan formann flokksins, búi að baki. Hún blæs á allar sögusagnir:
„Þótt það sé vinsælt að teikna upp þá mynd að tvær konur geti ekki verið saman í herbergi, þá er það bara ekki rétt og brottför mín hefur ekkert með hana að gera,“ segir Helga og ítrekar að hún verði áfram dyggur félagi í Samfylkingunni.
Þingsetning verður þriðjudaginn 12. september og segir í Morgunblaðinu, að Helga Vala hyggist afhenda forseta Alþingis bréf á mánudag þar sem hún afsalar sér þingmennsku. Varamaður hennar er Dagbjört Hákonardóttir.
Heimildir Viljans herma að Kristrún Frostadóttir leggi áherslu á nokkra endurnýjun í þingliði flokksins að loknum næstu kosningum, sem gætu orðið fyrr en seinna miðað við ástandið í ríkisstjórninni.
Talið er að Logi Einarsson, fv. formaður flokksins sé öruggur í sessi í Norðausturkjördæmi og Jóhann Páll Jóhannsson, helsti stuðningsmaður Kristrúnar sömuleiðis hér á höfuðborgarsvæðinu.
Gert er ráð fyrir að Guðmundur Árni Stefánsson, bæjarfulltrúi í Hafnarfirði og varaformaður flokksins, snúi aftur í landsmálin, en hann var áður ráðherra og þingmaður. Sömuleiðis er gert ráð fyrir að Dagur B. Eggertsson borgarstjóri verði orðinn þingmaður Samfylkingarinnar áður en langt um leiður, sem og Þórður Snær Júlíusson, ritstjóri Heimildarinnar, áður Kjarnans.
