Dr. Ólína Þorvarðardóttir, fv. þingmaður Samfylkingarinnar segir hræðilegt að Kvenréttindafélag Íslands skuli vera farið að safna undirskriftum til stuðnings við frumvarp Svandísar Svavarsdóttur heilbrigðisráðherra um þungunarrof, en í því er gert ráð fyrir að leyfileg mörk fyrir fóstureyðingu verði færð í lok 22. viku. Segist hún ekki lengur finna til samstöðu með Kvenréttindafélaginu, sem sé rekið eins og undirdeild í Vinstri grænum, flokki ráðherrans.
„Eiginlega er mér óskiljanlegt af hverju verið er að eiga við núgildandi mörk (16 vikur í reynd). Um þau var full sátt. Konur sem vilja gjarnan styðja sjálfsákvörðunarrétt kvenna og innleiða hugtakið þungunarrof – ég er í þeim hópi – eiga þess vegna mjög erfitt með að styðja frumvarpið með svo rúmum tímamörkum. Fyrir vikið er verið að reka fleyg í samstöðu kvenna um sjálfsákvörðunarrétt í þessum málum. Það finnst mér afar slæmt,“ segir Ólína í færslu sem hún ritar á fésbók í dag.
Hún undrast framgöngu Kvenréttindafélags Íslands, sem sé „gengið í lið með heilbrigðisráðherra í þessu máli og farið að safna undirskriftum við frumvarpið eins og félagið sé einhverskonar undirdeild í flokki ráðherrans.“
„Sjálf finn ég ekki til samstöðu með Kvenréttindafélaginu eins og málum er háttað,“ segir Ólína.
