Þórdís Kolbrún Reykfjörð Gylfadóttir utanríkisráðherra hyggst leggja fram að nýju frumvarp til laga um breytingar á EES-samningnum, eða svonefnda bókun 35. Málið náði ekki fram að ganga á vorþingi og er umdeilt meðal þingmanna, jafnt í stjórnarliðinu sem og stjórnarandstöðu.
„Með frumvarpinu er ætlunin að gera nauðsynlegar breytingar til þess að breyta innleiðingu bókunar 35 við EES samninginn og tryggja fulla virkni hans hér á landi í þágu einstaklinga og lögaðila,“ segir í útskýringartexta frá utanríkisráðuneytinu.
Bókun 35 er svohljóðandi: „Vegna tilvika þar sem getur komið til árekstra á milli EES-reglna sem komnar eru til framkvæmdar og annarra settra laga, skuldbinda EFTA-ríkin sig til að setja, ef þörf krefur, lagaákvæði þess efnis að EES-reglur gildi í þeim tilvikum.“
Meðal þeirra sem komu að samningu frumvarpsins, fyrir hönd utanríkisráðherra, er Sigríður Á. Andersen, lögmaður og fv. dómsmálaráðherra. Eins og fram kom í Viljanum á dögunum, sagði hún að loknum flokksráðsfundi Sjálfstæðisflokksins, að það verði Sjálfstæðisflokknum mjög þungt, ætli utanríkisráðherra að leggja frumvarpið fram að nýju.
Muni það krefjast þess að þingmenn flokksins, allir sem einn, ekki bara utanríkisráðherrann, setji sig inn í málið og tali fyrir því af sannfæringu, ef menn hafa þá sannfæringu fyrir því.
Sigríður Á. Andersen sat í hóp sem utanríkisráðherra skipaði til að skrifa frumvarpið, en hafnaði því að vera höfundur þess. „Það er alls ekki þannig, ég sat í hópi sem utanríkisráðherra skipaði til að semja þetta frumvarp að því efni sem ráðherrann sjálfur valdi,“ sagði hún og bætti við: „Ráðherrann ber sjálfur eins og ætíð ábyrgð á sínum eigin frumvörpum og ég hef ekki farið í neinar grafgötur með það að mér finnst þetta ekki gott mál, ekki gott þingmál. Það náði ekki fram að ganga á síðasta þingi, eins og ég hafði spáð, og ég myndi sjálf sem ráðherra aldrei leggja fram svona mál.“
