„Eitt mikilvægasta hlutverk sveitarfélaga er að auðvelda fólki að koma sér upp heimili. Það gera þau með því að tryggja gott aðgengi að lóðum á verði sem ekki leggjast sem mara á fjölskyldur þessa lands,“ segir Elliði Vignisson, bæjarstjóri í Ölfusi.
Hann segir að á næstu dögum hefjist verklegar framkvæmdir við byggingu húsa í nýju hverfi sem er kallað Vesturberg, vestan við Bergin. Göturnar þar heiti eftir þeim konum sem voru frumbyggjar í bænum fyrir ríflega 70 árum. Um er að ræða fyrsta áfanga af fjórum á þessu skipulagssvæði. Í þessum áfanga rísa þarna 32 hús – mest einbýli, raðhús og parhús.
