„Ég hef lítið verið á Fésbókinni síðustu mánuði, enda önnum kafin við að klára að skrifa tíundu söguna um og eftir Stellu Blómkvist. Nú er þeim áfanga náð. Bókin á að koma út í maí.“
Þetta segir höfundur bókanna um lögmanninn og einkaspæjarann Stellu Blómkvist (sem aldrei hefur verið upplýst hver er) á fésbókinni í kvöld og taka þá aðdáendur glæpasagnanna vinsælu gleði sína.
„Fyrsta sagan, Morðið í Stjórnarráðinu, birtist árið 1997. Framhaldið, Morðið í Sjónvarpinu, kom út um aldamótin. Fjórar bækur fylgdu í kjölfarið næstu árin; Morðið í Hæstarétti 2001, Morðið í Alþingishúsinu 2002, Morðið í Drekkingarhyl 2005 og Morðið í Rockville. Eftir að sjötta bókin sá dagsins ljós árið 2006 neyddist ég til að gera nokkurra ára hlé á ritun Stellubókanna. En tók upp þráðinn að nýju með Morðinu á Bessastöðum árið 2012, Morðunum í Skálholti 2015 og Morðinu í Gróttu 2017,“ segir höfundurinn dularfulli ennfremur.
Og hún (skrifar í kvenkyni) bætir við:
„Það verður skratti gaman að handleika tíundu bókina í vor.“
